काठमाडौं- भुक्तानी प्रणाली सञ्चालक नेपाल ईलेक्ट्रोनिक पेमेन्ट सिष्टम्स(नेप्स) लिमिटेडले पहिलोपटक सेयरधनीलाई लाभांस दिने निर्णय गरेको छ।
कम्पनीको आज सम्पन्न वार्षिक साधारणसभाले सेयरधनीलाई चुक्ता पुँजीको १० प्रतिशत नगद लाभांस दिने निर्णय गरेको छ। काठमाडौंमा सम्पन्न साधारणसभाले आर्थिक वर्ष २०७८/७९ को नाफाबाट १ करोड ७६ लाख रुपैयाँ बराबरको लाभांस दिने प्रस्ताव पारित गरेको हो।
२०६९ सालमा स्थापना भएको नेप्सले भुक्तानी प्रणाली सञ्चालन गरिरहेको छ।
कम्पनीले आर्थिक बर्ष २०७८/७९ मा विभिन्न सदस्य बैंक तथा वित्तीय सस्थाका ३६ लाख ग्राहकलाई प्रत्यक्ष वित्तीय सेवा दिएको थियो। नेप्सले सो क्रममा ३ खर्ब ६६ अर्ब रुपैयाँ कारोबार गरेको थियो।
नेप्सले २ हजार १ सय एटीएम, १२ हजार पीओएस बाट सेवा दिइरहेको छ।
गएको वर्ष कम्पनीले कार्डलेस विथड्रल, कन्ट्याक्टलेस कार्ड, ग्रिन पिन, ई- कमर्श कारोवार जस्ता फिचर्स थप गरेको थियो।
गएको कम्पनीले अघिल्लो वर्षको तुलनामा ३५ प्रतिशतले कारोबार रकम बढाएको थियो। त्यस्तै ५२ प्रतिशतले आम्दानी बढाएको थियो। कम्पनीले गएको वर्ष ६ करोड ८३ लाख नाफा गर्न सफल भएको छ।
