काठमाडौं- तरलता अभाव बढ्दै गएपछि नेपाल राष्ट्र बैंकले बैंक तथा वित्तियसंस्थाहरूले प्रवाह गर्ने कर्जा प्रवाहमा कडाइ गरेको छ।
राष्ट्र बैंकले एकीकृत निर्देशन जारी गर्दै बैंक तथा वित्त कम्पनीले प्रयोजन नखुलाइ माग हुने कर्जामा कडाइ गरेको हो। निर्देशनसँगै अब बैंक तथा वित्तीय संस्थाहरूले व्यक्तिगत कर्जा ५० लाख रुपैयाँसम्म मात्र प्रवाह गर्न पाउने छन्। सेयर धितोमा समेत कर्जा प्रयोजनको खर्च गर्ने नखुलाए ५० लाख रुपैयाँ मात्रै प्रवाह गर्न राष्ट्र बैंकले निर्देशन दिएको हो।
नेपाल राष्ट्र बैंकले एकिकृत निर्देशन, २०७७ लाई संशोधन/परिमार्जन थप व्यवस्था गर्दै सो परिपत्र जारी गरेको हो। यसअघि नै राष्ट्र बैंकले निश्चित प्रयोजन नखुलेका ओभर ड्राफ्ट, सवारी धितो, सम्पत्ति धितो, व्यक्तिगत आवधिक कर्जा, सेयरको धितोमा प्रदान गरिएको कर्जा लगायत जुनसुकै शीर्षकका व्यक्तिगत कर्जाहरू प्रति ५० लाख रुपैयाँ मात्र कर्जा दिन निर्देशन दिएको थियो।
त्यस्तै मुद्दती निक्षेप रसिद, सुन चाँदी र नेपाल सरकार वा नेपाल राष्ट्र बैंकको ऋणपत्रको धितोमा शत प्रतिशतसम्म बैंकहरूले कर्जा प्रवाह गर्न पाउने व्यवस्था समेत खारेज गर्दै ५० लाखको सीमा तोकेको छ। ५० लाखभन्दा बढी प्रवाह गर्न परेमा प्रयोजन खुलाउनु पर्ने निर्देशन राष्ट्र बैंकले निर्देशन जारी गरेको छ।
