काठमाडौं- जापानी दुईपांग्रे सवारी उत्पादक कम्पनी होन्डाको भगिनी कम्पनी होन्डा मोटरसाइकल एन्ड स्कुृटर इन्डिया (एचएमएसआई)ले भारतमा आफ्नो कार बिक्री ५ करोड पार गरेको घोषणा गरेको छ। होन्डा भारतमा २००१ मा एक्टिभा स्कुटर सहित पुनः आएको थियो।
होन्डाको एक्टिभा स्कुटर भारतीय बजारमा आजपर्यन्त सर्वाधिक बिक्री हुने दुईपांग्रेमा पर्दछ। पछिल्ला वर्षमा भारतमा होन्डाको बिक्री वृद्धि उत्पाहजनक देखिएको छ।
होन्डाले भारतमा आफ्नो उपस्थिति भएको १६ वर्षमा २ करोड ५० लाख वटा मोटरसाइकल तथा स्कुटर बिक्री गरेको थियो। त्यसपछि २ करोड ५० लाख वटा मोटरसाइकल तथा स्कुटर बिक्रीको सफलता हात पार्न होन्डालाई जम्मा ५ वर्षमात्र लागेको गाडीवाडीले लेखेको छ।
होन्डाको एक्टिभा स्कुटर भारतमा सर्वाधिक रुचाइएको स्कुटर हो। एक्टिभा मात्र भारतीय बजारमा २ करोड ५० लाख वटा बिक्री भएको थियो। कम्पनीले एक्टिभा उक्त संख्यामा बिक्री भएको केही महिना अघि सार्वजनिक गरेको थियो।
हाल भारतमा एक्टिभा दुई भेरियन्ट एक्टिभा सिक्सजी र एक्टिभा १२५ उपलब्ध छ। होन्डाका जनरल मोडल जस्तै एक्टिभा, ग्राजिया, हर्नेट २.०, सीबी२०० एक्सलगायत छन् भने प्रिमियम माोडलमा सीबी३५०, सीबीआर६५० आर, अफ्रिका ट्वीन, गोल्ड विङलगायत छन्।
नेपाली बजारमा पनि होन्डाका मोटरसाइकल तथा स्कुटर लोकप्रिय छन्। होन्डाको डियो स्कुटर नेपालमा धेरै बिक्री हुने दुईपांग्रेमा पर्छ। त्यस्तै होन्डा सीबी साइन मोटरसाइकल पनि रोजाइमा पर्ने गरेको छ।
होन्डाका मोटरसाइकल नेपाली बजारमा ज्योति समूह अन्तर्गतको स्याकार ट्रेडिङले बिक्री गर्दै आएको छ। स्याकारले नेपालमा दर्जन बढी मोडलका स्कुटर तथा मोटरसाइकल बिक्री गर्दै आएको छ।
