काठमाडौं- दसैँ नजिक आइसक्दा पनि बैंकिङ प्रणालीमा निक्षेप बढ्न नसक्दा विगत एक सातादेखि स्थिर देखिएको छ। चाडपर्वमा खासगरी रेमिट्यान्स तथा अन्य क्षेत्रबाट बैंकमा रकम आउने गरेता पनि अझै पनि बढ्न सकेको छैन।
यता नेपाल राष्ट्र बैंकका गभर्नर महाप्रसाद अधिकारीले विदेशी मुद्राको दबाब कम नभएसम्म बैंकहरूमा लगानीयोग्य रकमको अभाव हुने बताएका छन्। शनिबार आयोजित एक कार्यक्रममा गभर्नर अधिकारीले तत्कालै बैंकहरूमा प्रशस्त रकम जम्मा हुने स्थिति नआएको तर सहज भने हुँदै गइरहेको बताए।
नेपाल राष्ट्र बैंकका अनुसार बैंकिङ प्रणालीमा ५० खर्ब ३१ अर्ब निक्षेप रहेको छ। यो गत साता पनि ५० खर्ब ३१ अर्ब नै रहेको थियो। यता वाणिज्य बैंकहरूमा पनि ४४ खर्ब ३४ अर्ब रहेको निक्षेप एक सातादेखि बढ्न सकेको छैन। एक साताअगाडि भने वाणिज्य बैंकहरूमा ८ अर्ब निक्षेप थपिएको थियो। त्यसयता कुनै पनि रकम वाणिज्य बैंकमा थपिएको छैन।
वित्तीय संस्थाहरूबाट जारी गरिने ऋण प्रवाह पनि बढेको छैन। पछिल्लो एक सातामा १ अर्ब मात्रै ऋण प्रवाह भएको छ। हालसम्म ४७ खर्ब ११ अर्ब ऋण प्रवाह पुगेको छ। वाणिज्य बैंकहरूको ऋण ऋण प्रवाह ४१ खर्ब ७७ अर्ब रहेको छ। सीडी रेसियो पनि ८८.३६ प्रतिशतमा पुगेको छ।
वित्तीय संस्थाहरूलाई नेपाल राष्ट्र बैंक दिएको ९० प्रतिशतको सीडी रेसियोको सीमा धान्न भदौ महिनाभित्रै गाह्रो पर्ने देखिएको छ।
