काठमाडौं- जीवन बीमा कम्पनीहरुले साउन महिनामा १५ अर्ब ५ करोड ७५ लाख रुपैयाँ मात्रै बीमा शुल्क आर्जन गरेका छन्। यो गत आर्थिक वर्षको यही अवधिको तुलनामा ९.३५ प्रतिशतले कमी आएको हो। गत वर्ष यो अवधीमा  १६ अर्ब ६१ करोड रुपैयाँ कुल बीमाशुल्क संकलन गरेका थिए। 

१९ बीमा कम्पनी मध्ये सबैभन्दा धेरै संकलन गर्नेमा नेपाल लाइफ इन्स्योरेन्स हुँदा नेशनल लाइफ दोस्रो स्थानमा रहेको छ। सबैभन्दा धेरै प्रगति गर्नेमा भने नयाँ कम्पनीहरु सन नेपाल लाइफ, ज्योति लाइफ र सिटिजन लाइफ रहेका छन्।  

जीवन बीमा अन्तर्गत नेपाल लाइफले आफ्नो अग्रतालाई कायम राख्दै एक्लैले ४ अर्ब ७७ करोड ३६ लाख रुपैयाँ भन्दा बढी बीमाशुल्क आर्जन गरेको छ। यो जीवन बीमा कम्पनीहरुले आर्जन गरेको कुल बीमाशुल्कको ३१.७० प्रतिशत हो। गत आर्थिक वर्षको साउनसम्ममा कम्पनीले ४ अर्ब ७६ करोड रुपैयाँ कुल बीमाशुल्क आर्जन गरेको थियो।

नेपाल लाइफले कुल बीमाशुल्क आर्जनमा आफ्नो अग्रता कायमै राख्दा एलआईसी नेपालले कुल बीमाशुल्क उल्लेख्य बढाएको छ। यस अवधिमा एलआईसीको बीमाशुल्क ८८.४९ प्रतिशतले बढेर १ अर्ब ८८ करोड ४९ लाख रुपैयाँ कुल बीमाशुल्क आर्जन गरको छ। गत आर्थिक वर्षको यसै अवधिमा कम्पनीले १ अर्ब रुपैयाँ मात्रै बीमाशुल्क आर्जन गरेको थियो।

यस्तै, महालक्ष्मी लाइफ,सन नेपाल लाइफ र सानिमा लाइफ इन्स्योरेन्सको बीमाशुल्क ३० प्रतिशत भन्दा धेरैले बढेको छ। सबैभन्दा कम बीमा शुल्क बढाउनेमा नेपाल लाइफ इन्स्योरेन्स रहेको छ। सबै भन्दा धेरै बीमाशुल्क आर्जन गरेको नेपाल लाइफको बीमाशुल्क ०.२९ प्रतिशतले बढेर ४ अर्ब ७७ करोड ३६ लाख रुपैयाँमा पुगेको हो। कम्पनीले गत आर्थिक वर्षको साउन महिनामा ४ अर्ब ७६ करोड रुपैयाँ मात्रै कुल बीमाशुल्क आर्जन गरेको थियो।

राष्ट्रिय बीमा संस्थानको बीमाशुल्क सबै भन्दा धेरै ८६.५४ प्रतिशतले घटेर ५० करोड २१ लाख रुपैयाँमा सीमित भएको छ। संस्थानले गत आर्थिक वर्षको यसै अवधिमा ३ अर्ब ७३ करोड रुपैयाँ कुल बीमाशुल्क आर्जन गरेको थियो। यस्तै प्रभु लाइफको पनि ३०.९८ प्रतिशत, रिलायवल नेपाल लाइफको २.६३ प्रतिशत र मेट लाइफको १.३८ प्रतिशतले बीमाशुल्क घटेको छ।