काठमाडौं- भदौको पछिल्लो साता बैंकिङ प्रणालीको निक्षेप स्थिर देखिएको छ। भदौ महिनाको ३ गतेसम्म वाणिज्य बैंकहरूको निक्षेप ४४ खर्ब २६ अर्ब रहेकोमा भदौ १० गतेसम्ममा पनि सोहि निक्षेप कायम रहेको बैंकर्स संघले जनाएको छ। तर ऋण प्रवाह भने २ अर्ब रुपैयाँ बढेको छ।
संघका अनुसार भदौ ३ गते बैंकहरूको कर्जा प्रवाह ४१ खर्ब ७८ अर्ब रहेकोमा भदौ १० गतेसम्ममा बैंकहरूको कर्जा प्रवाह २ अर्बले बढेर ४१ खर्ब ८० अर्ब पुगेको छ। यस अवधिमा बैंकहरूको सिडी रेसियो ८८.४२ प्रतिशत रहेको संघले जनाएको छ।
चालु आर्थिक वर्ष सुरु भएयता बैंकको निक्षेप १ खर्ब १५ अर्बले घटेको छ। असार ३२ गते बैंकहरूको निक्षेप ४५ खर्ब ४१ अर्ब रहेकोमा भदौ १० गतेसम्मको अवधिमा बैंकहरूको निक्षेप घटेर ४४ खर्ब २६ अर्ब पुगेको हो।
