काठमाडौं- कोरोना महामारी सुरु भएपछि पहिलोपटक मनाङमा विदेशी पर्यटक पुग्न थालेका छन्। 

पहिलो चरणको कोरोना महामारी सरू भएदेखि नै पर्यटकका लागि कडाइ गरिएको मनाङमा पछिल्लो समय भने विदेशी पर्यटक पनि पुग्न थालेका छन्। 

संघीय सरकारको निर्णयअनुसार मनाङमा अहिले डबल डोज भ्याक्सिन लगाएको वा कोरोना नेगेटिभ रिपोर्ट भएका पर्यटकलाई निर्वाध प्रवेश दिने जिल्लास्थित कोरोना नियन्त्रण समन्वय समितिले निर्णय गरेपछि पर्यटक प्रवेश सुरु भएको छ। 

जिल्लामा पर्यटकका लागि खुकुलो भएपछि धेरै नभएपनि सानो सङ्ख्यामा पर्यटकहरू आउन थालेको मनाङका प्रमुख जिल्ला अधिकारी विष्णु लामिछानेले जानकारी दिए। 

'अहिले ६०/७० जना विदेशी पर्यटकहरू यहाँ हुनुहुन्छ। सामान्य अवस्थाको जस्तो होइन। अहिले जेहोस आउन थालेका छन्' उनले भने। 

सन् २०२१ को जनवरीमा नेपालका अन्य ठाउँमा विदेशी पर्यटकका लागि सहज हुँदासमेत मनाङ लगायतका हिमाली जिल्लामा कडाइ गरिएको थियो।