काठमाडौं- बैंक अफ काठमाण्डू लिमिटेडले आज बिहीबारदेखि ऋणपत्र निष्कासन गर्ने भएको छ। कम्पनीले सात वर्ष अवधिको १० दशमलव ५० प्रतिशत ब्याजदर रहेको ऋणपत्र निष्कासन गर्न लागेको हो।
कम्पनीले प्रतिकित्ता १ हजार रुपैयाँ अंकित दरका १ अर्ब १० करोड रुपैयाँ बराबरको ११ लाख कित्ता ऋणपत्र निष्कासन गर्नेछ। जसमध्ये ६० प्रतिशत अर्थात् ६६ करोड रुपैयाँ बराबरको ६ लाख ६० हजार कित्ता व्यक्तिगत तवरबाट बिक्री गर्नेछ। यस्तै ४४ करोड रुपैयाँ बराबरको ४० प्रतिशत अर्थात् ४ लाख ४० हजार कित्ता ऋणपत्र सर्वसाधारणका लागि निष्कासन गर्नेछ।
सर्वसाधारणलाई बिक्री गर्ने ४ लाख ४० हजार कित्तामध्ये २२ हजार कित्ता ऋणपत्र सामूहिक लगानी कोषलाई बाँडफाँट गरेको छ। बाँकी रहेको ४ लाख १८ हजार कित्ता ऋणपत्रमा सर्वसाधारणले आवेदन दिन पाउनेछन्। आवेदकले न्यूनतम २५ कित्तादेखि अधिकतम १ लाख कित्ता ऋणपत्रको लागि आवेदन दिन सक्नेछन्।
ऋणपत्र निष्कासन तथा विक्री प्रबन्धकमा एनआईबिएल एस क्यापिटल लिमिटेड रहेको छ। ऋणपत्रमा भदौ ७ गतेसम्म आवेदन दिन सकिनेछ।
