काठमाडौं- सरकारले सन् २०२३ देखि २०३३ सम्म भ्रमण दशकका रुपमा विभिन्न कार्यक्रम सञ्चालन गर्ने भएको छ।
संस्कृति पर्यटन तथा नागरिक उड्डयनमन्त्री जीवनराम श्रेष्ठले पर्यटन प्रवर्द्धनलाई अभियानको रूपमा अघि बढाउनुपर्ने बताउँदै सन् २०२३ देखि २०३३ सम्म भ्रमण दशक सञ्चालन गरिने बताए।
कोरोना महामारीको मारमा परेको पर्यटनको पुनरुत्थानका लाग कार्ययोजना सार्वजनिक गर्दै मन्त्री श्रेष्ठले भ्रमण वर्षको रुपमा उत्सव मनाउनुभन्दा पनि अभियानकै रुपमा अघि बढाउनुपर्ने बताएका हुन्।
'दिन र वर्षको रुपमा पर्यटन प्रवर्द्धन गर्नेभन्दा पनि भ्रमण दशकका रुपमा मनाउनुपर्ने अवधारणा हामीले सारेका छौँ' उनले भने।
मन्त्रालयले पर्यटन प्रवर्द्धनका लागि ७३ बुँदे कार्ययोजना सार्वजनिक गरेको छ। कार्ययोजनामा एक महिनामा गर्न सकिनेदेखि दीर्घकालसम्मका योजना छन्।
अधिकांश काम छिटो र छोटो समयमै सम्पन्न हुने खालका रहेको उनले बताए। आगामी दशकलाई भ्रमण दसक घोषणा गरिने उनले जानकारी दिएका छन्।
