काठमाडौं- थाई स्माइल एयरवेजले बैंकक-काठमाडौं नियमित उडान सुरू गरेको छ। 

शुक्रबारदेखि एयरवेजले नियमित उडान सुरू गरेको हो। एयरलाइन्सले  एयरबस–३२० मा इकोनोमी क्लासमा १५० र प्रिमियम इकोनोमी क्लासमा १२ सिट गरी जम्मा १६२ सिटको क्षमताको जहाजबाट उडान गर्नेछ। 

आरआर ग्रुप अफ कम्पनिज अन्तर्गतको सोसाइटी इन्टरनेशनल ट्राभल सर्भिसेसले थाई स्माइल एयरवेजका लागि बिक्री, मार्केटिङ र एयरपोर्ट सञ्चालन सेवाको साथै सम्पूर्ण ग्राहक र एजेन्सी सपोर्ट सेवाहरू प्रदान गर्दै आइरहेको छ ।

थाई एयरवेज इन्टरनेशनल पब्लिक कम्पनी लिमिटेड (थाई) को सहायक वायुसेवा कम्पनी थाई स्माइल एयरवेजका कार्यवाहक प्रमुख कार्यकारी अधिकृत भिसेट सोन्तिचाइले यो उडानले यात्रुलाई सहयोग पुग्ने जानकारी दिएका छन्। 

बैंकक-काठमाडौं रुटमा हाल नेपाल एयरलाइन्सले हप्तामा चार उडान गर्दै आएको छ। थाइ स्माइलले भने दैनिक उडान गर्ने भएको छ।