काठमाडौं- नेपाल वायुसेवा निगम (नेपाल एयरलाइन्स)ले ६४औं वार्षिकोत्सव मनाएको छ। निगमले केन्द्रीय कार्यालयमा नै नयाँ वेबसाइट लन्च गर्दै कार्यक्रम मनाएको हो।
निगमले अनलाइनबाटै टिकट बुकिङमा सहज हुने गरी नयाँ वेबसाइट लन्च गरेको हो। साइटको लन्च संस्कृति, पर्यटन तथा नागरिक उड्डयन मन्त्री जीवनराम श्रेष्ठले गरेका थिए।
निगमले साइट लन्च गर्दै अबको एक महिना भित्रै नेपाल एयरलाइन्स मार्फत हवाई यात्रा गर्नेले अनलाइनबाटै टिकट काट्न पाउने निगम महाप्रबन्धक दीपु ज्वार्चनले बताए। ज्वार्चनले निगमका अगाडि चुनौतीहरु रहे पनि सामुहिक प्रयासको माध्यमले सफलतातिर लाग्न सकिन्छ बताए।
नयाँ काम थाल्नेतिर भन्दा पहिलो चरणमा पुराना योजना पुरा गर्ने तिर निगमले प्रयास थालेको उनले बताए। ‘संस्थामा आन्तरिक सुधार गर्दै अन्तर्राष्ट्रिय जगतमा प्रतिष्ठा बढाउने तर्फ निगमको प्रयास रहने छ’, उनले भने, ‘तर त्यसमा एक्लो व्यक्तिको प्रयास मात्र पर्याप्त नहुने भएकोले निगमका समस्त कर्मचारीको सहयोगको चाहिन्छ।’
