काठमाडौं- विश्व बैंकले पूर्वपश्चिम राजमार्गको ६९ किलोमिटर सडक स्तरोन्नतिका लागि फेरि लगानी गर्ने भएको छ। बैंकले बुटवल- गोरुसिंगे- चनौटा खण्डको स्तरोन्नतिमा ३४ अर्ब ७४ करोड बराबरको ऋण लगानी गर्ने भएको छ। 

बैंकले एक्सिस प्रोजेक्टका नाममा नेपालमा २७ करोड ५० लाख अमेरिकी डलर लगानी गर्ने भएको हो। 

यो परियोजना अन्तर्गत दुई लेन सेक्सनमा स्तरोन्नतिको काम हुने छ। अहिले नै दुई लेन भएको राजमार्गमा अहिले नारायणघाटदेखि बुटवल खण्डको काम भइरहेको छ। 

सुरक्षित यातायातका लागि पूर्वाधार निर्माणमा काम गरिने बैंकले उल्लेख गरेको छ। पूर्वाधार बनेपछि यो खण्डको यात्रा समय ३० प्रतिशत घट्ने छ। 

सडकको स्तरोन्नतिपछि व्यापार तथा उद्यमशीलतामा विकास हुने, महिला सहभागिता तथा समाजिक विकासका क्षेत्रमा परिणाम देखिने बैंकको विश्वास छ। 

सडकको पूर्वाधारसँगै यो परियोजना अन्तर्गत बजार क्षेत्रमा अरु पूर्वाधार पनि निर्माण हुनेछन्। बजार क्षेत्रमा महिलाका लागि छुट्टै सार्वजनिक शौचालय निर्माण हुनेछन्। नि:शुल्क वाईफाईसँगै डिजिटल बोर्ड निर्माण हुनेछन्।