काठमाडौं- सीवाईसी नेपाल लघुवित्त वित्तीय संस्था लिमिटेडको सेयर नेप्सेमा सूचीकृत भएको छ। सोमबारबाट दोस्रो बजारमा कम्पनीको पहिलो कारोबार हुनेछ। पहिलो कारोबारका लागि नेप्सेले न्यूनतम ३४४.३६ रुपैयाँदेखि अधिकतममा १०३३.०८ रुपैयाँको ओपनिङ रेन्ज तोकेको छ। लगानीकर्ताले पहिलो दिन नै १० हजार ३ सय ३० रुपैयाँ कमाउने देखिएको छ। 

धितोपत्र निष्काशन तथा बाँडफाँट निर्देशिका २०७४ बमोजिम लघुवित्तको गोलाप्रथाबाट ३६ हजार ९४८ जनाले आईपीओ प्राप्त गरेका थिए। यसरी बाँडफाँट गरेर बाँकी रहेको ८ कित्ता सेयर गोलाप्राथबाट सेयर पाउने ३६ हजार ९४८ जनामध्ये ८ जनालाई थप १/१ कित्ताका दरले बाँडफाँड गरिएको छ। जसअनुसार भाग्यमानी ३६ हजार ९४० जनाले १० कित्ताका दरले र ८ जना आवेदकले ११ कित्ताका दरले सेयर पाएका थिए।

कम्पनीले बैशाख २ गतेबाट ६ गतेसम्म कुल ३ लाख ९५ हजार ३३६ कित्ता सेयर बिक्रीमा ल्याएको थियो। जसमा १९ हजार ७६६ कित्ता सामूहिक लगानी कोष र ६ हजार ८२ कित्ता कर्मचारीहरुका लागि छुट्याइएको थियो। बाँकी ३ लाख ६९ हजार ४८८ कित्ता सर्वसाधारणको लागि बाँडफाँट गरेको थियो।

लघुवित्तको आईपीओमा कुल २२ लाख ५ हजार ६३३ जनाको आवेदन परेको थियो। त्यस मध्ये ३ हजार २७२ जानको आवेदन रद्द भएकाले २२ लाख २ हजार ३६१ वटा आवेदन मात्र सदर भएको थियो। 

हाल लघुवित्तको चुक्तापुँजी ८ करोड २१ लाख ८ हजार २४० रुपैयाँ छ। आईपीओ बाँडफाँटपछि लघुवित्तको चुक्तापुँजी १२ करोड १६ लाख ४१ हजार ८४० रुपैयाँ पुगेको छ।