काठमाडौं- अर्थमन्त्री जनार्दन शर्माले रासायनिक मल आयातमा ढिलाइ भएको स्वीकार गरेका छन्।
आर्थिक वर्ष २०७९/०८० को बजेटमाथिको सैद्धान्तिक छफलमा उठेका प्रश्नको उत्तर दिँदै उनले मल आयातमा ढिलाइ भएको स्वीकार गरेका हुन्।
अहिले मल आयात भइरहेको र क्रमश: मल किसानलाई वितरण हुँदै जाने जवाफ दिँदै उनले मल आयातमा आवश्यक रकम अभाव हुन नदिने समेत बताएका छन्।
उनले मल र बीउका लागि पर्याप्त बजेट विनियोजन भएकाले आवश्यकताअनुरुप बजेट व्यवस्थापन हुने भन्दै कृषकलाई मलको अभाव हुन नदिने बताए।
कृषि क्षेत्रमा प्रोत्साहन, बाँझो जमिनको सदुपयोग र युवालाई कृषिमा आकर्षण गर्न बजेटले कार्यक्रम समावेश गरेको उनले जानकारी दिए। किसानलाई आत्मसम्मानका साथ उत्साहित गर्नुपर्ने भएकाले योगदानमा आधारित किसान हितकोषको व्यवस्था गरिएको र बजेटले आन्तरिक उत्पादनलाई जोड दिएको उनले उल्लेख गरे।
