काठमाडौं- सरकारले आयकर ऐन संशोधन गर्दै रोजगारीबाट आय हुने रकमबाट तिर्नुपर्ने करको सीमा हेरफेर गरेको छ।

यसअघि विवाहितको हकमा वार्षिक ४ लाख ५० हजार रुपैयाँ र अविवाहितको हकमा ४ लाख रुपैयाँ लाग्ने १ प्रतिशत लिँदै आएको थियो। तर आयकर ऐन संशोधन गर्दै अब विवाहितको हकमा वार्षिक ६ लाख रुपैयाँसम्म १ प्रतिशत र अविवाहितको हकमा ५ लाख रुपैयाँ सम्म १ प्रतिशत मात्रै कर लाग्ने व्यवस्था गरेको छ।

यो व्यवस्थासँगै राज्यलाई तिर्नुपर्ने आयकर कम हुने भएको छ। उदाहरणका लागि पुरानो व्यवस्थाअनुसार अविवाहितले मासिक १ लाख रुपैयाँका दरले तलब बुझ्दा वार्षिक १२ लाख आम्दानी हुँदा २ लाख ४ हजार रुपैयाँ कर तिर्नु पर्ने थियो। ४ लाख रुपैयाँसम्मको १ प्रतिशतका दरले ४ हजार रुपैयाँ, ४ देखि ५ लाख रुपैयाँसम्म थप १ लाखको १० प्रतिशतका दरले १० हजार, ५ देखि ७ लाख रुपैयाँसम्म थप २ लाख रुपैयाँको २० प्रतिशतका दरले ४० हजार रुपैयाँ र ७ देखि १२ लाख रुपैयाँसम्मको ५ लाखको ३० प्रतिशतका दरले १ लाख ५० हजार रुपैयाँ गरी वार्षिक १२ लाखरुपैयाँ आम्दानी गर्दा २ लाख ४ हजार रुपैयाँ कर तिर्नु पर्ने थियो। 

अब आयकर संशोधन भएसँगै मासिक १ लाख रुपैयाँ तलब बुझदै वार्षिक १२ लाख रुपैयाँ आम्दानी गर्दा अविवाहितले १ लाख ४५ हजार रुपैयाँ कर तिरे पुग्छ। अब ५ लाख रुपैयाँसम्मको १ प्रतिशतले ५ हजार रुपैयाँ, ५ देखि ७ लाख रुपैयाँसम्म २ लाखको १० प्रतिशतका दरले २० हजार रुपैयाँ, ७ देखि १० लाख रुपैयाँसम्म ३ लाखको २० प्रतिशतका दरले ६० हजार र १० देखि १२ लाख रुपैयाँसम्म थप २ लाखको ३० प्रतिशतका दरले ६० हजार गरी वार्षिक १ लाख ४५ हजार रुपैयाँ आयकर तिरे पुग्छ।

यसैगरी विवाहितले पहिले मासिक एक लाख रुपैयाँका दरले वार्षिक १२ लाख रुपैयाँ आम्दानी गर्दा राज्यलाई १ लाख ८९ हजार ५ सय रुपैयाँ आयकर तिर्नु पथ्र्यो। अब आयकर संशोधन भएसँगै विवाहितले मासिक १ लाखका दरले वार्षिक १२ लाख रुपैयाँ आम्दानी गर्दा १ लाख १६ हजार रुपैयाँ आयकर तिरे पुग्छ।

आयकर संशोधनपछि ६ लाख रुपैयाँसम्म  १ प्रतिशतका दरले ६ हजार, ६ लाख देखि ८ लाख रुपैयाँसम्म थप २ लाख रुपैयाँको १० प्रतिशतका दरले २० हजार रुपैयाँ, ८ देखि ११ लाख रुपैयाँसम्म थप ३ लाख रुपैयाँको २० प्रतिशतका ६० हजार रुपैयाँ र ११ लाख रुपैयाँदेखि १२ लाख रुपैयाँसम्मको थप १ लाखको ३० हजार रुपैयाँ गरी वार्षिक १ लाख १६ हजार रुपैयाँ आयकर तिरे पुग्छ।