काठमाडौं- कानूनी प्रक्रिया पूरा गरेर निजगढ अन्तर्राष्ट्रिय विमानस्थल निर्माणको कामअगाडि बढाउन सरकारलाई निर्देशन भएको छ।
प्रतिनिधि सभाको अन्तर्राष्ट्रिय श्रम सम्बन्ध समितिको सिंहदरबारमा बसेको बैठकले कानूनी अड्चन फुकाएर निजगढ अन्तर्राष्ट्रिय विमानस्थलको निर्माण प्रक्रिया थालनी गर्न सरकारलाई निर्देशन दिएको हो।
गत बिहीबार मात्रै सर्वोच्चको वृहत पूर्ण इजलासबाट निजगढ अन्तर्राष्ट्रिय विमानस्थल नबनाउन आदेश जारी गरेको थियो। तर संसदीय समितिले निजगढ अन्तर्राष्ट्रिय विमानस्थल निर्माण प्रक्रिया सुरु गर्न निर्देशन दिएको हो।
सरकारले पनि आइतबारमात्रै संसदमा आगामी आर्थिक वर्षको बजेट प्रस्तुत गर्दै आगामी आर्थिक वर्षभित्र निजगढ अन्तर्राष्ट्रिय विमानस्थल निर्माणको ढाँचा ढुंगो लगाइ लगानी बोर्डमार्फत विमानस्थल निर्माणको प्रक्रिया अगाडि बढाउने विषय बजेटमा समावेश गरेको थियो।
विमानस्थल निर्माणमा अहिलेसम्म ३ अर्ब रुपैयाँभन्दा बढी खर्च भइसकेको छ।
