काठमाडौं- आर्थिक वर्ष २०७८/०७९ को दोस्रो महिना भदौमै रोजगारीका लागि ३६ हजारभन्दा बढी युवा विदेशिएका छन्।
वैदेशिक रोजगार विभागका अनुसार भदौ महिनामा ३६ हजार ४ सय युवाले अन्तिम श्रम स्वीकृत लिएका छन्। यो नै २०६७ चैतपछिको सबैभन्दा ठूलो संख्या हो। विभागका अनुसार भदौ महिनामा ३४ हजार २ सय १८ जना पुरुष र १ हजार ८ सय २२ जना महिलाले विदेश जानका लागि अन्तिम श्रम स्वीकृत लिएका छन्।
जसमा म्यानपावर मार्फत २२ हजार ६ सय ८ जना युवा विदेश पुगेका छन्। यसैगरी नेपाल बिदामा आइ फर्कनेको संख्या पनि ११ हजार ३ सय ४८ रहेको छ।
साउनमा भने २५ हजार ४ सय २८ युवा रोजगारीका लागि विदेश पुगेका थिए। विभागका अनुसार चालु आर्थिक वर्षको दुई महिनामा ५९ हजार ६ सय ४६ जना युवा रोजगारीका लागि विदेश पुगेका छन्।
युवाको रोजाइँमा कतार
वैदेशिक रोजगारीका लागि विदेश जाने युवाको पहिलो रोजाइँमा कतार परेको छ। भदौ महिनामा मात्रै नेपालबाट रोजगारीका लागि १४ हजार ७ सय ९२ जना युवा कतार पुगेका छन्।
जसमा म्यानपावरमार्फत ८ हजार ८ सय २११ जना युवा कतार पुगेका छन् भने बिदामा नेपाल आइ पुनः फर्कनेको संख्या ५ हजार ४ सय ४३ जना रहेका छन्।
तर, नयाँ कामका लागि म्यानपावरमार्फत सबैभन्दा बढी कामदार भने साउदी अरब पुगेका छन्। भदौ महिनामै म्यानपावर मार्फत ११ हजार ६ सय २५ जना युवा साउदी अरब पुगेका छन्। भदौ महिनामा साउदीको रोजगारीका जाने युवाको संख्या भने १३ हजार ५ सय ८७ रहेको छ। यसैगरी, ४ हजार ६ सय ३५ जना युवा युएई पुगेका छन्।
