काठमाडौं- कोभिडका कारण ठप्पजस्तै भएको वैदेशिक रोजगारीको क्षेत्र कोभिड अगाडिकै अवस्थामा फर्किएको छ।

वैदेशिक रोजगार विभागले सार्वजनिक गरेको तथ्यांकअनुसार चालु आर्थिक वर्ष २०७८/०७९ को साउनदेखि बैशाख (१० महिना)मै वैदेशिक रोजगारीका लागि नेपालबाट ५ लाख ५ हजार ४ सय ९० युवाले अन्तिम श्रम स्वीकृत लिँदै रोजगारीका लागि विश्वका विभिन्न देशमा पुगेका छन्।

जसमा नयाँ कामको लागि संस्थागत तर्फ (म्यानपावर मार्फत) अन्मित श्रम स्वीकृत लिँदै वैदेशिक रोजगारीका लागि जाने युवाको संख्या २ लाख ४८ हजार ७ सय ५६ जना रहेका छ।

यसैगरी विदामा नेपाल आइ पुनः वैदेशिक रोजगारीका लागि विदेश फर्कने युवाको संख्या २ लाख ३० हजार ३ सय १६ रहेको छ।

यसबाहेक २६ हजार ४ सय १८ जना भने व्यक्तिगत नयाँ तथा व्यक्तिगत वैधानीकरण प्रक्रियामार्फत वैदेशिक रोजगारीका लागि विदेश पलालयन भएका छन्।

कुन महिना कति?

विभागका अनुसार बैशाख महिनामा ४५ हजार ४ जना युवा वैदेशक रोजगारीका लागि विश्वका विभिन्न देश पुगेका छन्। यसैगरी चैत महिनामा ५५ हजार ५ सय २३ युवा वैदेशिक रोजगारीका लागि विश्वका विभिन्न देश पुगका थिए।

यसैगरी फागुनमा ५३ हजार ४ सय ५७, माघमा  ५४ हजार ४ सय ७०, पुसमा ६६ हजार ६ सय २५ र मंसिरमा सबैभन्दा बढी ७४ हजार ३ सय ५४ जना युवा वैदेशिक रोजगारीका लागि विदेश गएका छन्।

यसैगरी कात्तिकमा ५४ हजार ९ सय १८, असोजमा ३९ हजार ६ सय ७१, भदौमा ३६ हजार ४० र साउनमा २५ हजार ४ सय २८ जना युवा वैदेशिक रोजगारीका लागि विदेश पलायन भएका छन्।