काठमाडौं- गौतम बुद्ध अन्तर्राष्ट्रिय विमानस्थलबाट अन्तर्राष्ट्रिय उडान गर्ने वायुसेवा कम्पनीहरूले एक वर्षसम्म विमानस्थल सेवा शुल्क २०७८ मा तोकेको शुल्कमा सतप्रतिशत छुट पाउने भएका छन्।

नेपाल नागरिक उड्डयन प्राधिकरणले गरेको प्रस्ताव संस्कृति, पर्यटन तथा नागरिक उड्डयन मन्त्रालयबाट स्वीकृत भएको हो। प्राधिकरणको प्रस्ताव स्वीकृत भएसँगै अब गौतम बुद्ध अन्तर्राष्ट्रिय विमानस्थलबाट उडान गर्ने एयरलाइन्स कम्पनीहरूले जहाज ल्यान्डिङ, पार्किङ, सञ्चार उपकरण लगायतको  विमानस्थल सेवा शुल्कवापत तिर्नुपर्ने रकममा सतप्रतिशत छुट पाउने छन्।

नेपाल नागरिक उड्डयन प्राधिकरणले जेठ २ बाट बुद्ध जयन्तीबाट गौतम बुद्ध अन्तर्राष्ट्रिय विमानस्थलबाट व्यवसायिक उडान सुरु गरेको हो। अहिले विमानस्थलबाट जजिरा एयरले सातामा तीनवटा उडान गरिरहेको छ।

गौतमबुद्ध  विमानस्थलमा अन्तर्राष्ट्रिय उडानमा प्रेरित गर्न एक वर्षसम्म विमानस्थल सेवा शुल्क वापत लाग्ने सबै शुल्कमा छुट दिने निर्णय भएको प्राधिकरणका महानिर्देशक इन्जिनिरयर प्रदीप अधिकारीले बताए।

प्राधिकरणले नयाँ विमानस्थल सेवा शुल्क नियमावली २०७८ अनुसार विमानस्थलको प्रचार प्रसार र एयरलाइन्स कम्पनीलाई आकर्षित गर्न विमानस्थल सेवा शुल्क नियमावली २०७८ अनुसार लाग्ने सबै शुल्कमा छुट दिने प्रस्ताव गरेको गरेको थियो।

प्रस्ताव पारित भएसँगै अब विमानस्थल सेवा शुल्कअनुसार एयरलाइन्स कम्पनीले उडान गर्न तिर्नु पर्ने रकममा सबै छुट पाउने छन्। यसबाट एयरलाइन्स कप्म्पनीको प्रतिडान ३ लाख रुपैयाँसम्म जोगिने छ।