काठमाडौं- बागमती प्रदेशमा दर्ता भएका सवारी साधनको कर इसेवाबाट तिर्न सकिने भएको छ।
सवारी दर्ता तथा नविकरणको शुल्क तिर्न सकिनेगरी प्रदेश सरकार र इसेवाको सम्झौता भएको हो। योसँगै सवारी साधनको कर, दर्ता र नवीकरण अनलाइनबाटै गर्न सकिने भएको छ।
कर तिर्न, सवारी दर्ता तथा नवीकरण तथा इन्स्योरेन्सको भुक्तानी गर्न यातायात कार्यालयमा लाइन लाग्नुपर्ने बाध्यताको अन्त्य हुने इसेवाले जानकारी दिएको छ।
दुई पांग्रे, चार पाङ्ग्रे, ठूला तथा हेवी सवारी, निजी तथा सार्वजनिक कुनै पनि किसिमका सवारी साधनको कर, दर्ता र नवीकरणको भुक्तानी इसेवाबाटै गर्न सकिनेछ ।
इसेवामा खाता भएका प्रयोगकर्ताले आफ्नो मोबाईलबाटै कर भुक्तानी, दर्ता र नवीकरण गर्न सकिन्छ भने नभएकाले नजिकको इसेवा जोन तथा पोइन्टबाट सेवा लिन सकिन्छ ।
मोबाइल तथा इन्टरनेटको माध्यमबाट भुक्तानी गर्न सकिने सेवा दिएको इसेवामा हाल प्रत्यक्ष रूपमा खाता खोल्नेको संख्या करिब ४५ लाख रहेको छ ।
