काठमाडौं (बैशाख, ३०)- भैरहवामा अन्तर्राष्ट्रिय विमानस्थल निर्माण भएर सञ्चालनमा आउनेभएपछि बुद्ध एयरले अन्तर प्रदेश उडान गर्ने भएको छ। 

काठमाडौंपछि पोखरालाई हब बनाएर उडान विस्तार गरेको बुद्धले अब भने भैरहवाबाट पनि सबै प्रदेश जोड्नेगरी उडान सुरु गर्ने भएको छ। 

पोखराबाट गरिएको अन्तर प्रदेश उडान सफल भएपछि बुद्धले भैरहवाबाट पनि त्यस्तै उडान गर्ने जानकारी दिएको छ। 

भैरहवामा अन्तर्राष्ट्रिय विमानस्थल सञ्चालन भएपछि त्यहाँ आउने यात्रुलाई अर्को आन्तरिक विमानस्थलसम्मको सेवा दिनका लागि उडान सुरु गर्न खोजिएको बुद्धले जानकारी दिएको छ। 

अहिले बुद्धले भैरहवाबाट पोखरा र भरतपुर उडान  गरिरहेको छ। 

भैरहवाबाट विराटनगर, भद्रपुर, जनकपुर, सिमरा, नेपालगञ्ज र धनगढीमा  क्रमशः उडान सुरु गर्ने योजना रहेको बुद्ध एयरले जानकारी दिएको छ।