काठमाडौं- लामो प्रतिक्षापछि नेपालको दोस्रो अन्तर्राष्ट्रिय विमानस्थल ‘गौतम बुद्ध अन्तर्राष्ट्रिय विमानस्थल’मा जेठ २ गतेबाट व्यावसायिक उडान सुरु हुने भएको छ।

कुवेतको जजिराबाट व्यावसायिक उडान सुरु हुने भएको छ। नेपाल नागरिक उड्डयन प्राधिकरण गौतम बुद्ध अन्तर्राष्ट्रिय विमानस्थल कार्यालयका महाप्रबन्धक गोविन्द प्रसाद दाहालका अनुसार जेठ २ गते बुद्ध जयन्तीको दिन बिहान ७ बजे जजिराको जहाज विमानस्थलमा अवतरण हुने छ। 

७ बजे अवतरण भएको जहाज बिहान १० बजे  कुवेतका लागि उडान गर्ने छ। व्यावसायिक उडान सुरु हुने दिन प्रधानमन्त्री शेर बहादुर देउवा समेत गौतम बुद्ध अन्तर्राष्ट्रिय विमानस्थल पुग्ने छन्। जजिराले सातामा ३ उडान गर्ने छ।

विमानस्थलमा बैशाख १५ गते मात्रै डेमो उडानसमेत भइसकेको छ। गौतम बुद्ध अन्तर्राष्ट्रिय विमानस्थल त्रिभुवन अन्तर्राष्ट्रिय विमानस्थल जस्तै पूर्ण रुपमा सञ्चालन हुने प्राधिकरणको दाबी छ।