काठमाडाैं- नेपाल निर्माण व्यवसायी महासंघले निर्माण सामाग्रीमा भएको अत्याधिक मूल्यवृदि, सार्वजनिक खरिद नियमावली २०६४ को एघारौ संसोधनमा रहेका त्रुटि तथा बीमा निर्देशिका परिमार्जनलगायतको बिरोधमा धर्ना सुरु गरेका छन्।
महासंघले बिहीबार सार्वजिनक खरिद अनुगमन कार्यालयमा शान्तिपूर्ण धर्ना दिएका हुन्।
महासंघद्वारा गत चैत १५ गते आयोजित पत्रकार सम्मेलनमै निर्माण सामाग्रीमा भएको शतप्रतिशत मूल्यवृद्धिसँगै बजारमा तिनको अभाव र कालोबजारी समेत सुरु भएको अध्यक्ष सिंहले बताएका थिए। उनले त्यति बेलै सरकारले उक्त माग सम्बाेधन नगरे आन्दाेलन गर्न बाध्य हुने चेतावनी समेत दिएका थिए।
मूल्यवृद्धिको समायोजनका लागि सार्वजनिक खरिद ऐन, २०६३ बमोजिम सबै आयोजनाहरूमा व्यावसायीले मूल्यवृद्धि पाउने गरी २०६५ को जस्तै सार्वजनिक खरिद अनुगमन कार्यालयले प्राविधिक मागदर्शन नं.२ तुरुन्त जारी गर्नुपर्ने महासंघको माग रहेको छ।
मूल्यवृद्धि नियन्त्रण नभएसम्मको अवधिलाई गणना हुने गरी सरकारले ‘निर्माण होलिडे’ घोषणा गर्नुपर्ने माग महासंघको छ।
सार्वजनिक खरिद नियमावली, २०६४ को एघारौं संशोधनको त्रुटि सच्याएर मुलुकको निर्माण उद्योगलाई व्यवस्थित तथा मर्यादित बनाउन पनि महासंघले आग्रह गर्दै आएको छ।
