काठमाडाैं- उपकार लघुवित्त वित्तीय संस्थाले सर्वसाधारणका लागि शुक्रबारबाट साधारण सेयर बिक्री खुला गरेको छ। संस्थाले निष्कासन गर्ने सेयरमा चैत २९ गतेसम्म आवेदन दिन सकिनेछ।
लघुवित्तले प्रति सेयर १०० रुपैयाँ दरका २ लाख ३६ हजार २५० कित्ता सेयर निष्कासन गर्न लागेको हो। कम्पनीको जारी पुँजी ६ करोड ५६ लाख २५ हजार रुपैयाँ छ भने त्यसको ३६ प्रतिशत सेयर सर्वसाधारणलाई बिक्री गर्न लागेको हो।
लघुवित्तले निष्कासन गर्न लागेको सेयरमध्ये जारी पुँजीको ०.५ प्रतिशतले ३ हजार २८१ कित्ता कर्मचारीलाई र ५ प्रतिशतले अर्थात ११ हजार ८१३ कित्ता सामूहिक लगानी कोषलाई छुट्याइएको छ। सर्वसाधारणले २ लाख २१ हजार १५६ कित्ता सेयरमा मात्र खरिदका लागि दाबी गर्न पाउने छन्।
कम्पनीको सेयरमा न्यूनतम १० कित्ता र अधिकतम १ हजार कित्तासम्म आवेदन दिन सकिनेछ। लघुवित्तले आईपीओको बिक्री प्रबन्धकमा नेपाल एसबीआई मर्चेन्ट बैंकिङ लिमिटेड नियुक्त्त गरेको छ।
