काठमाडौं (चैत, २०) - निजी हवाई सेवा प्रदायक कम्पनी बुद्ध एयरले भद्रपुरबाट पोखरा उडान गर्ने भएको छ। बुद्धले बैशाख २ गतेबाट भद्रपुर-पोखरा सिधा उडान गर्न लागको हो। एयरले सुरुवाती भाडादर ६ हजार ९ सय रुपैयाँ तोकेको छ।

उक्त रुटमा उडान नियमित हुने छ। दैनिक १ बजेर २५ मिनेटमा पोखराबाट उडान गर्ने र भद्रपुरबाट ३ बजे पोखराका लागि उडान गर्ने छ।

भद्रपुर-पोखरा उडानबाट गण्डकी प्रदेश र एक नम्बर प्रदेशका नागरिक बाहेक सिमापारी सिलिगढी, दार्जिलिङ, सिक्किमबाट पनि पर्यटकहरु भित्रिन सजिलो हुने एयरलाइन्सको भनाइ छ। सीमापारिबाट आएका पर्यटकहरु भद्रपुरबाट पोखराको सिधा उडान भर्न सक्ने एयरलाइन्सले जनाएको छ।

भद्रपुर वरिपरि रहेको विभिन्न पर्यटकीय तथा धार्मिक गन्तव्यका साथै इलामका चियाबगान, हिमश्रृंखलाहरुको पनि पर्यटकहरुले अवलोकन गर्न सक्नेछन्। 

बुद्ध एयरको भगिनी संस्था बुद्ध होलिडेजले यी दुवै गन्तव्यका लागि आकर्षक होलिडी प्याकेजहरु पनि ल्याएको छ। भद्रपुर-पोखरा प्याकेजका लागि १५ हजार रुपैयाँमा २ रात ३ दिनको प्याकेज, जसमा दुईतर्फि हवाई टिकट, पोखरा एयरपोर्टबाट होटल तथा होटलबाट पोखरा एयरपोर्ट गाडी सुविधा, वातानुकुलित ट्वीन शेयरिङ रुम र बिहानको ब्रेकफास्ट संलग्न रहेको एयरले जनाएको छ।

बुद्ध एयर काठमाडौं बाहेक पोखरबाट देशको विभिन्न प्रदेशहरुसँग सिधा उडानले गर्दै आएको छ।  यसअघि नै बुद्ध एयरले पोखराबाट भैरहवा, भरतपुर, नेपालगञ्ज, सिमरा, धनगढी र जनकपुरबाट सिधा उडान गर्दै आएको छ।  
बुद्ध एयरसँग ७२ सिटे एटीआर-७२ जहाज ११ वटा, ४२ सिटे एटीआर-४२ जहाज ३ वटा र दुईवटा बीचक्राफ्ट जहाहरु रहेका छन्।