काठमाडौं- नेपाल नागरिक उड्डयन प्राधिकरणले काठमाडौंको त्रिभुवन अन्तर्राष्ट्रिय विमानस्थलबाट हेलिप्याड हटाउने तयारी गरेको छ।
अन्तर्राष्ट्रिय विमानस्थल साँघुरो हुँदै गएको र सुरक्षित र द्रुत सेवाका लागि हेलिप्याड हटाउने निष्कर्षमा प्राधिकरण पुगेको छ। त्रिभुवन अन्तर्राष्ट्रिय विमानस्थलबाट हेलिप्याड हटाएर हेलिकप्टरका लागि व्यवस्थित र सुरक्षित पूर्वाधार निर्माण गर्ने प्राधिकरणको योजना छ।
अहिले काठमाडौंको विमानस्थलमा आन्तरिक नियमित, अन्तर्राष्ट्रिय र कार्गो उडान हुँदै आएको छ। हेलिकप्टरका लागि पनि दैनिक यात्रुहरू विमानस्थलकै सुरक्षा घेरा पार गर्दै गइरहेका हुन्छन्।
अरु सबै उडानको प्रकृति उस्तै भएपनि हेलिकप्टरको उडान तथा सञ्चालन विधि र प्रक्रिया नै फरक भएकाले विमानस्थलबाट छुट्याउनुपर्ने प्राधिकरणले निष्कर्ष निकालेको छ।
उच्च पदस्थ नेतादेखि दैनिक पर्वतीय उडानमा जाने यात्रुहरू हेलिप्याडसम्मै पुगेर यात्रा गर्ने गरेका छन्। हेलिकप्टर पनि सँगै हुँदा कतिपय नेताहरू प्रोटोकल विपरीत निजी गाडी हेलिप्याडसम्मै लैजाने गरेका छन्।
प्राधिकरणले निरन्तर ताकेता गरेपनि भीआइपीहरूले आफ्नो गाडी हेलिप्याडसम्म लैजाने गरेका छन्। नियमन कठिन भएकाले पनि हेलिप्याड स्थानान्तरण गर्ने निष्कर्षमा प्राधिकरण पुगेको छ।
प्राधिकरणले त्रिभुवन अन्तर्राष्ट्रिय विमानस्थलबाट हटाएर भक्तपुरको नर्लिङमा हेलिप्याड बनाउने तयारी गरेको छ। नर्लिङमा प्राधिकरणकै ४० रोपनी जग्गा भएको र त्यहीँ ठाउँमा हेलिप्याड बनाउने तयारीमा रहेको महानिर्देशक प्रदीप अधिकारीले जानकारी दिए।
'नयाँ हेलिप्याड बन्नेमात्र होइन त्यहाँ आधुनिक टर्मिनलसहितको सुविधासम्पन्न पूर्वाधार बन्छ' उनले भने।
यसका लागि अहिले प्राधिकरणले आन्तरिक तयारी गरिरहेको छ। लागत अनुमान तथा प्राविधिक अध्ययनको काम भइरहेको अधिकारीले जानकारी दिए। प्राविधिक रुपमा सम्भव देखिनेवित्तिकै हेलिप्याड निर्माणको काम अघि बढ्ने उनको भनाइ छ।
