म्याग्दी- म्याग्दीको धौलागिरि गाउँपालिका-७ बगरका भुवानी पौडेलले सरकारी कार्यालयको जागिर छाडेर बाख्रापालन गरी स्वरोजगार र आत्मनिर्भर बनेका छन्।

दश वर्षसम्म बेनीमा रहेको कृषि विकास कार्यालयमा सहयोगी कर्मचारीको रुपमा करारमा काम गरेका पौडेलले स्थापना गरेको बगर कृषि तथा पशु बहुउद्देश्यीय फार्मबाट सफलता पाएका हुन्।

'पाँच वर्षजति खाडीमुलुकमा वैदेशिक रोजगारी गरेर फर्केपछि विसं २०६६ देखि ११ वर्षसम्म बेनीको कृषि विकास कार्यालयमा सहयोगीको रुपमा काम गरेको थिए', उनले भने, 'संघीयतापछि जागिर छाडेर बाख्रा पाल्ने सोच पलायो। नौ वटाबाट सुरु गरेको फार्ममा अहिले ६० भन्दा बढी बाख्रा छन्।'

वार्षिक ३५ देखि ४० वटासम्म खसीबोका बिक्री गरेर पाँच लाखसम्म आम्दानी गर्ने पौडेलले तीन जना छोराछोरीलाई सदरमुकाम बेनीमा राखेर पढाउनुका साथै घरव्यवहार चलाउन सजिलो भएको बताए। खसीबोकाबाहेक पाठापाठी पनि बिक्री हुने गरेको छ।

ग्राहकहरु पाठापाठी र खसीबोका खोज्दै घरमै आउने गरेकाले बजारको समस्या छैन। पौडेलले बाख्रापालनसँगै व्यवसायिक रुपमा सुन्तला र तरकारीखेती पनि गरेका छन्। एक सय बोटमध्ये ४० बोट सुन्तलाले उत्पादन दिन थालेका छन्। थप एक सय सुन्तलाका बिरुवा रोपेर खेती विस्तार गरेका छन्।

वैदेशिक रोजगार र करारको जागिरको तुलनामा खेती किसानी र बाख्रापालनबाट सन्तुष्टि मिलेको पौडेलले अनुभव सुनाए। व्यवस्थित किसिमको खोर बनाएर जमुनापारी जातको बाख्रा पालेका पौडेलले उन्नत बोयर जातको एक वटा बोका सहयोग पाएका छन्।

फार्मको पूूर्वाधार विस्तारमा पौडेलले सरकारी निकायबाट सहयोगको अपेक्षा गरेका छन्। घरवरपरको पाखामा चरनमा आधारित बाख्रापालन गरेएका पौडेलले बहुवर्षीय डालेघाँस खेती पनि गरेका छन्।

बाख्राको सुरक्षाका लागि ठूला जीउडाल भएका एक वटा भोटे जातको सहित दुई वटा कुकुर पालेका छन्। रातको समयमा खोर वरपर रुघेर बस्ने कुकुर जंगलमा बाख्रा चराउन लैजाँदा अघिपछि गरेर सुरक्षा दिने गर्छ।

जंगली जनावरको संकेत पाएमा भुकेर जानकारी दिने कुकुरले भिडेर बाख्रालाई आक्रमणबाट बचाउन सहयोग गरेको कृषक पौडेलले बताए। भुवानीलाई बाख्रापालनमा श्रीमती भगवतीले पनि सघाएकी छिन्। रासस