तनहुँ- आँबुखैरेनी गाउँपालिका-६ मा पहिलोपटक सडक कालोपत्र गर्न थालिएको छ। हालसम्म उक्त वडाका कुनै पनि सडक कालोपत्र गरिएका थिएनन्।

वर्षौँदेखि कच्ची सडकको सास्ती भोग्दै आएका यहाँका बासिन्दाले अब सहज र सुरक्षित यातायात सुविधा पाउने आशा गरेका छन्। गाउँपालिकाको चालु आर्थिक वर्ष २०८२/८३ को बजेटअन्तर्गत हिलेखर्क खण्डमा २ किलोमिटर र समस्तीपुर-गिरन्चौर खण्डमा २ किलोमिटर सडक कालोपत्रको काम भइरहेको गाउँपालिकाका इन्जिनियर पंकज मगरले जानकारी दिए।

हिलेखर्क सडक स्तरोन्नति योजनाअन्तर्गत जोगीनिभञ्ज्याङदेखि वडा नं ६ को कार्यालयसम्मको सडक सुधारकार्यलाई तीव्रता दिइएको छ। पहिलो चरणमा करिब २ किलोमिटर सडक कालोपत्र गरिँदैछ भने जोगीनिभञ्ज्याङदेखि हिलेखर्कसम्मको खण्डका लागि करिब २ करोड रुपैयाँ खर्च हुने उनले बताए।

यस सडकले गाउँपालिकाको वडा नं १, २ र ६ लाई प्रत्यक्ष रूपमा जोड्ने भएकाले यसको रणनीतिक महत्त्व पनि उच्च छ। स्थानीय किसानका लागि कृषि उपज बजारसम्म पुर्‍याउन सहज हुने, विद्यार्थीलाई विद्यालय आवतजावतमा सहजता हुने तथा बिरामीलाई स्वास्थ्य संस्था पुर्याउन समयमै सेवा प्राप्त हुने गाउँपालिकाका अध्यक्ष शुक्र चुमानले जानकारी दिए।

गिरन्चौरदेखि सार्तेसम्मको सडक स्तरोन्नतिका लागि संघीय सरकारबाट विनियोजित करिब ६ करोड रुपैयाँ हालसम्म कार्यान्वयन हुन नसकेको उनले बताए। उक्त बजेट कार्यान्वयनमा ढिलाइ हुँदा बरादीदेखि हिलेखर्कसम्मको सम्पूर्ण सडक कालोपत्र कार्य अधुरै रहने अवस्था देखिएको छ।

अध्यक्ष चुमानले भने, 'यदि सो बजेट समयमै कार्यान्वयनमा आएको भए चालु आवभित्रै बरादी-हिलेखर्क सडक पूर्ण रूपमा कालोपत्र हुने थियो।'

अध्यक्ष चुमानले स्थानीय तहको बजेटबाट सम्भव भएसम्म सडक पूर्वाधार विकासलाई प्राथमिकता दिइएको बताउँदै संघीय सरकारको बजेट छिट्टै कार्यान्वयनमा आउने विश्वास व्यक्त गरे। 'हामीले आफ्नो स्रोतले सक्दो काम अघि बढाएका छौँ, बाँकी काम संघीय बजेट कार्यान्वयनसँगै पूरा हुनेछ,' उनले भने।

वडाध्यक्ष दिलीप गुरुङका अनुसार सडक कालोपत्र भएपछि धुलो र हिलोको समस्या अन्त्य हुने, सवारीसाधन सञ्चालनमा सहजता आउने र समग्र आर्थिक गतिविधि चलायमान हुने अपेक्षा गरिएको छ। रासस