.jpg)
.jpg)
.gif)
.gif)
रुकुम पश्चिम- रुकुम पश्चिमको त्रिवेणी गाउँपालिकामा यस वर्ष अदुवा बिक्रीबाट मात्रै ५ करोड ५६ लाख ५० हजार रुपैयाँ भित्र्याएको छ। पालिकाभर २ हजार ६ सय ५० किसानले उत्पादन गरेको अदुवा बिक्रीबाट उक्त रकम भित्रिएको हो।
.gif)
त्रिवेणी गाउँपालिका कृषि शाखा प्रमुख ऐनबहादुर कार्कीका अनुसार यस वर्ष पालिकाभर १५ हजार ९ सय क्विन्टल अदुवा उत्पादन भएको थियो। अदुवा खेती गर्ने २ हजार ६ सय ५० घरधुरीमध्ये प्रत्येक किसानले करिब २ रोपनी क्षेत्रफलमा अदुवा खेती गर्दै आएका छन्।
.gif)
.gif)
पालिकाभर ५ हजार ३ सय रोपनी क्षेत्रफलमा अदुवा उत्पादन भइरहेको छ। १ रोपनी जमिनमा करिब ३ क्विन्टलसम्म अदुवा उत्पादन हुने गरेको उनको भनाइ छ।
प्रत्येक किसानले गाउँबाटै प्रतिक्विन्टल ३ हजार ५ सय रुपैयाँमा अदुवा बिक्री गरेका शाखा प्रमुख कार्कीले बताए। व्यापारी अदुवा खरिद गर्न गाउँमै आउने गरेका छन्। व्यावसायिक रूपमा अदुवा खेती गर्दै आउनुभएका त्रिवेणी-४ खुम्चेरीका नरे खड्काले यस वर्ष अदुवा बिक्रीबाट १ लाख रुपैयाँ आम्दानी गरेको बताए।
विगत २२ वर्षदेखि उनी निरन्तर अदुवा खेतीमा संलग्न छन्। यस वर्ष उत्पादन भएकोमध्ये साढे तीन क्विन्टल बीउका लागि राखेको उनले बताए। रासस
