म्याग्दी- म्याग्दीको प्रमुख धार्मिक पर्यटकीयस्थल मालिका धुरी तीनतर्फबाट सडक सञ्जालमा जोडिएको छ। समुद्री सतहदेखि ३ हजार ४०० मिटर उचाइमा रहेको मालिका मालिका र रघुगंगा गाउँपालिकाको सिमानामा अवस्थित छ।

मंगलबार गाउँपालिका-२ हिदीदेखि मालिकाको फेदीमा रहेको जुगेदेउराली जोड्ने सडकको मार्ग खुलेपछि यातायातको साधन प्रयोग गरेर मालिका जाने भक्तजन र पर्यटकका लागि तेस्रो विकल्प बनेको हो।

मालिका गाउँपालिकाको केन्द्र दरवाङदेखि बिम बाइन्दफाँट हुँदै मालिका जोड्ने सडक विसं २०८० र रघुगंगा गाउँपालिकाको ठाडाखानी हुँदै मालिकाको फेदीसम्म विसं २०८१ मा सडक पुगेको थियो।

मंगलबार गाउँपालिका र हिदीका बासिन्दाहरूको साझेदारीमा हिदीदेखि सुर्ती चढाउने डाँडा, गिद्रे देउराली, धौलेखर्क हुँदै मालिकाको फेदीमा रहेको जोगी देउराली जोड्ने ४ किलोमिटर ५०० मिटर दूरीको सडकको मार्ग खुलेको निर्माण समितिका अध्यक्ष थमप्रसाद पुनले बताए।

'गाउँपालिकाले चालु आर्थिक वर्षमा विनियोजन गरेको ३० लाख रुपैयाँ बजेटबाट ठेक्कामार्फत हिदीदेखि सुर्ती चढाउने डाँडासम्म २ किलोमिटर ५०० मिटर सडकको मार्ग खुलेको थियो,' उनले भने, 'हिदीका बासिन्दा र स्वदेश तथा विदेशमा रहेकाहरूबाट चन्दा सहयोग जुटाएर सुर्ती चढाउने डाँडादेखि गिद्रे हुँदै जुगेदेउराली जोडिएको सडकको ग्रेड र घुम्ती मिलाउने काम भइरहेको छ।'

सडक सुधारको सबै काम सकिएपछि चन्दा संकलन अभियान, आम्दानी र खर्च विवरण सार्वजनिक गरिने पुनले बताए। हिदीबाट एक घण्टामै मालिका पुग्न सकिने उनले बताए। जोगी देउरालीसम्म गाडी चल्न थालेपछि बेनीदेखि हिदी हुँदै चार घण्टामा मालिका पुग्न सकिने भएको हो।

पैदलयात्रा गरेर हिदीदेखि मालिका पुग्न चारदेखि पाँच घण्टा लाग्ने गरेको थियो। यातायातको सुविधा भएमा यात्रा अवधि दुई घण्टामा छोटिने र यो सडक बेनीदेखि मालिका जोड्ने सबैभन्दा छोटो दूरीको हुने हिदीबासीको दाबी छ।

मालिकाबाट धौलागिरि र अन्नपूर्ण रेञ्जका दर्जन बढी हिमालहरूका साथै सूर्योदय, सूर्यास्त, पहाडी भूगोल र वनजंगलको अवलोकन गन सकिन्छ। चण्डी, जेष्ठी र कार्तिक पूर्णिमामा विशेष दर्शन र पूजाआजा हुने यस मन्दिरमा मनोकांक्षा पूरा हुने जनविश्वास छ। विसं १९१० देखि पूजाआजा हुन थालेको इतिहास रहेको मालिकामा कालिका, मालिका र जालपादेवीको मूर्ति छन्। रासस