.jpg)
.jpg)
.gif)
.gif)
म्याग्दी- यहाँको धवलागिरि गाउँपालिका-५ मल्कवाङको माकुसका किसानले व्यावसायिक रूपमा जडीबुटीखेती गरेका छन्। परम्परागत खेतीको विकल्पमा सतुवा जातको जडीबुटीखेती गरेका हुन्। माकुसका बलबहादुर रोकाले ४ रोपनी पाखोबारीमा सतुवाखेती गरेको बताए।
.gif)
'इलामबाट प्रतिगोटा ३० रुपैयाँका दरले बिरुवा किनेर ल्याई सतुवा रोपेको हो,' उनले भने, 'एक सय किलोग्राम सतुवा उत्पादन भएको छ।' केही वर्षअघिसम्म प्रतिकिलोग्राम १६ हजार रुपैयाँमा बिक्री हुने सतुवाको मूल्य घटेर ५ हजार रुपैयाँ प्रतिकिलोमा झरेकाले बिक्री गर्न नपाएको उनले बताए।
.gif)
.gif)
रोकाले सतुवाको गानाका साथै १० हजार नयाँ बिरुवा तयार पारेका छन्। यसअघि मकै, गहुँ, कोदो, उवा, जौँखेती हुने पाखोबारी र खोल्साको पाखामा सतुवा लगाएको रोकाले बताए।
तत्कालीन सशस्त्र द्वन्द्वपछि ४५ वर्षीय रोका खेतीकिसानी र पशुपालन गर्दै आएका थिए। समुद्री सतहदेखि २ हजार ३ सय मिटर उचाइमा भिरालो पाखामा अवस्थित माकुसको भूगोल र हावापानी अनुकूल तथा उच्च मूल्य पाइने भएकाले सतुवाखेती गरेको रोकाले बताए।
उनले सतुवाखेतीका साथै व्यावसायिक बाख्रापालन पनि गरेका छन्। ५० भन्दा बढी बाख्रा पालेका छन्। माकुस नजिकैको जंगलमा प्राकृतिक रूपमा पनि सतुवा उत्पादन हुँदै आएको थियो। परम्परागत खाद्यबाली खेती गरेर लागत पनि उठाउन नसक्ने अवस्था भएपछि विकल्पमा जडीबुटीखेती गरेको रोकाले भने।
वैदेशिक रोजगार र परम्परागत खेतीकिसानीको विकल्पमा व्यावसायिक जडीबुटीखेती गरेका रोकालाई धवलागिरि गाउँपालिकाले सतुवाखेती गरेको बारीमा पर्खाल बनाएर घेराबार गर्न गत वर्ष १ लाख रुपैयाँ अनुदान सहयोग गरेको वडाध्यक्ष अमर छन्त्यालले बताए।
त्यसैगरी सतुवाको बिरुवा भएको पल्टमा पलास्टिकको टनेल बनाउन सकेमा तापक्रम सन्तुलित बनाउन, हिउँ, असिना र रोगकीराबाट बचाउन सकिने रोकाको अपेक्षा छ। औषधि बनाउन प्रयोग हुने सतुवा पेट दुखेको, घाँटी दुखेको, सर्पले टोकेको र मानिसले विष सेवन गरेको बेलामा प्रयोग गर्ने चलन छ। रासस
