काठमाडौं- पर्यटन विभागले करिब २ करोड रुपैयाँ खर्चेर पर्यटन पूर्वाधार विकास गर्ने भएको छ। विभागले ६ ठाउँको पर्यटन पूर्वाधार विकासका लागि कम्पनी समेत छनोट गरेको छ।
विभागले ६२ लाख ५३ हजार रुपैयाँ खर्चेर नुवाकोटको दुप्चेश्वरमा पर्यटन पूर्वाधार विकास गर्न लागेको हो। यसका लागि विभागले निसान कन्स्ट्रक्सन कम्पनी छनोट गरेको छ।
यसैगरी विभागले सिन्धुपाल्चोकको सतिदेवी क्षेत्रमा २० लाख ८० हजार रुपैयाँ खर्चेर पर्यटन पूर्वाधार विकासका लागि नाम्गेल कन्स्ट्रक्सन कम्पनी छनोट गरेको छ।
साथै विभागले सिराहको सुखिपुर क्षेत्रमा पर्यटन पूर्वाधार विकासका लागि ३६ लाख ६७ हजार रुपैयाँ र पर्वतको पवित्रा गुफा क्षेत्रको पर्यटन पूर्वाधार विकासमा १५ लाख ७४ हजार रुपैयाँ खर्च गर्ने गरी कम्पनी छनोट गरेको छ।
यसैगरी विभागले गोरखाकालिका स्याङ्जा क्षेत्रको पर्यटन पूर्वाधार विकासमा २८ लाख ६५ हजार रुपैयाँ र रक कलाइमिङ दोलखा क्षेत्रमा पर्यटन पूर्वाधार विकासमा ३० लाख ६६ हजार रुपैयाँ खर्च गर्ने गरी कम्पनी छनोट गरेको छ।
