काठमाडौं- चालु आर्थिक वर्षको सातौं महिनामा पुग्दा शोधनान्तर घटाको खाडाल न्यून हुँदै गएपनि विदेशी मुद्राको सञ्चिति घट्ने क्रम जारी नै छ।
डलरको मूल्य उच्च हुँदा नेपाली रुपैयाँमा विदेशी मुद्राको सञ्चिति बढेको देखिएपनि डलर सञ्चिति भने माघमा पनि घटेको छ। नेपाली रुपैयाँमा सवा सात अर्ब बराबरको विदेशी मुद्राको सञ्चिति बढेको देखिएको छ। तर वास्तविक विदेशी मुद्राको सञ्चिति भने एक महिनामै १४ करोड अमेरिकी डलर घटेको छ।
आयातको वृद्धिदरमा न्यून भएको, रेमिट्यान्स घट्ने दरमा पनि केही घटेकाले शोधनान्तर घटा बढ्ने क्रममा पनि ब्रेक लागेको छ। आयातको वृद्धिदर घट्दा आयात क्षमतामा सुधार भएपनि वास्तविक विदेशी मुद्राको सञ्चिति भने थपिन सकेको छैन।
असारको तुलनामा १७ प्रतिशतले विदेशी मुद्राको सञ्चिति घटेको छ। २०७८ को असारमा ११ अर्ब ७५ करोड अमेरिकी डलर सञ्चिति भएकोमा माघ मसान्तसम्म ९ अर्ब ७५ करोडमा सीमित भएको छ।
पछिल्लो सात महिनामा २ अर्ब अमेरिकी डलर सञ्चिति घटेको छ।
