काठमाडौं- कोरोना महामारिका कारणले सन् २०२० देखि अन्तर्राष्ट्रिय उडानमा कटौति गरेको भारतले उडान खुला गर्ने भएको छ।
भारत सरकारले मार्च २७ देखि (चैत १३) देखि नियमित अन्तर्राष्ट्रिय उडान सुरू गर्ने निर्णय गरेको छ। भारतीय नागरिक उड्डयन मन्त्रालयले एक सूचना जारी गर्दै मार्च २७ देखि नियमित व्यावसायिक उडान सुरू गर्ने जानकारी गराएको छ।
भारत सरकारको यो निर्णयसँगै नेपालसँगको एयर बबल(सीमित उडान) अन्त्य हुने भएको छ। चैत १३ गतेदेखि नेपालबाट भारतीय गन्तव्यमा अनुमति पाएका सबै एयरलाइन्सले नियमित उडान गर्न पाउने भएका छन्।
अहिलेसम्म तीनवटा एयरलाइन्सले मात्र काठमाडौं-नयाँ दिल्ली उडान गर्दै आएका छन्। यसरी गरिने उडानमा भारतीय र नेपाली यात्रुले मात्र ओहोरदोहर गर्न पाउने व्यवस्था थियो।
एयर बबल कायमै हुँदा सीमित उडान तर माग धेरै थियो। यही कारणले हवाइ भाडा पनि बढेको थियो।
एयर बबल खारेज भएपछि एयरलाइन्सहरूले नयाँ दिल्ली बाहेकका अरु गन्तव्यमा उडान गर्न पाउने छन् भने तोकिएका बाहेक एयरलाइन्सले पनि उडान गर्ने छन्।
हाल तीनवटा एयरलाइन्स नेपाल एयरलाइन्स, एयर इन्डिया र भिस्तारा एयरले मात्र उडान गर्दै आएका छन्। अब इन्डिगो र स्पाइसजेटले पनि उडान गर्न पाउने छन्।
