काठमाडौं- शिवम् सिमेन्टको सेयर मूल्य लगातार घटिरहेको छ। साताको पहिलो दिन पनि प्रतिकित्ता ८३ रुपैयाँले घटेको छ। आइतबार घटेर अन्तिम कारोबार १०८५ रुपैयाँ कायम भएको छ।
आएतबारमात्र नभएर केही समययता कम्पनीको सेयर मूल्य घटिरहेको छ। कम्पनीको सेयर मूल्य एक वर्षयताकै कम मूल्यमा आउने संकेत देखिएको छ। एक वर्ष अगाडि १०२७ रुपैयाँ सेयर मूल्य रहेको थियो।
सेयरधनीलाई कम्पनीले २९ प्रतिशत नगद लाभांश दिइसकेको छ। कम्पनीले हालसम्म सेयरधनीलाई बोनस सेयर दिएको छैन। चार वर्षको इतिहासमा हालसम्म १५ प्रतिशतभन्दा कम लाभांश दिएको छैन।
कम्पनीले चुक्ता पुँजी बढाउन लागेको छ। जसमा हकप्रदको चर्चासमेत चलाइएको छ। अहिलेसम्म कम्पनीको हकप्रदको निर्णय भएको छैन। आइतबार कम्पनीको सबैभन्दा बढी कारोबार भएको छ। आइतबार मात्रै १ लाख ३६ हजार कित्ता कारोबार हुदाँ १५ करोड २२ लाख रुपैयाँको सेयर किनबेच भएको छ।
पछिल्लो ५२ हप्तामा अधिकतम १९१० रुपैयाँ पुगेको सेयर मूल्य न्यूनतम १०२७ रुपैयाँमा कारोबार भएको थियो। कम्पनीको ४ करोड ४ लाख कित्ता सेयर नेप्सेमा सूचीकृत रहेको छ। कम्पनीको चुक्ता पुँजी ४ अर्ब ४० करोड रुपैयाँ रहेको छ भने बजार मूल्यांकन ४७ अर्ब ७४ करोड रुपैयाँ रहेको छ।
