काठमाडौं- नेपाल राष्ट्र बैंकले सुन आयातमा कडाइ गरेको छ। पछिल्लो समय विदेशी मुद्राको सञ्चिति घट्दै गएपछि आयातमा कडाइ गर्दै आएको केन्द्रीय बैंकले दैनिक आयात कोटामा आधा कटौति गरिदिएको हो। 

राष्ट्र बैंकले दैनिक आयातको कोटा १० किलो कायम गरिदिएको छ। यसअघि दिनमा २० किलो सुन आयात गर्न पाइन्थ्यो। 

अबदेखि मुलुकमा दिनमा १० किलोमात्र सुन आयात गर्न पाइने भएको छ। 

चालु आर्थिक वर्षको पहिलो सात महिनामै २५ अर्बको सुन आयात भएको छ। भन्सार विभागको तथ्यांक अनुसार यो वर्षको साउनदेखि माघसम्म २५ अर्ब बढीको सुन आयात भएको थियो। 

विदेशी मुद्राको सञ्चिति घट्दै गएपछि विभिन्न वस्तुको आयातमाथि कडाइ गर्दै आएको छ। यसअघि सरकारले चाँदी आयात रोक्न विदेशी विनिमयदेखि करसम्मका उपकरण परिचालन गरेको थियो।