काठमाडौं- नेपाल र भारत सरकारबीच जीटूजी व्यवस्थामार्फत युरिया र डीएपी मल आपूर्तिका लागि हस्ताक्षर भएको छ। नेपाल र भारत सरकारका सचिवबीच सोमबार समझदारी पत्रमा हस्ताक्षर भएको हो।

जीटूजी व्यवस्थामार्फत भारतबाट नेपालतर्फ युरिया र डीएपी मलको दीर्घकालीन आपूर्तिका लागि भारत र नेपालबीच समझदारी पत्रमा हस्ताक्षर भएको हो।

समझदारी पत्रमा भारत सरकार रसायन एव मल मन्त्रालयका सचिव राजेश कुमार चतुर्वेदी र नेपालको तर्फबाट कृषि तथा पशुपन्छी विकास मन्त्रालयका सचिव डा. गोविन्दप्रसाद शर्माले सो समझदारी पत्रमा हस्ताक्षर गरेका हुन्।

कृषि तथा पशुपन्छी विकास मन्त्री महिन्द्र राय यादव र नेपालका लागि भारतीय राजदूत विनयमोहन क्वात्राको उपस्थितमा हस्ताक्षर भएको हो। 

हस्ताक्षर समारोहमा बोल्दैसचिव राजेश कुमार चतुर्वेदीले भारत र नेपालबीचको निकट एवम् बहुपक्षीय सम्बन्धको चचा गरेका थिए। साथै उनले दुई पक्षबीच भएको सम्झौताले नेपालको अर्थतन्त्र तथा खाद्य सुरक्षामा सघाउ पुर्‍याइ कृषिको क्षेत्रमा भएको द्विपक्षीय सहकार्यलाई थप अघि बढाउने अपेक्षा गरेका छन्।

दुई पक्षबीच भएको यो समझदारीले नेपालमा बारम्बार दोहोरिने मल अभावको समस्यालाई सम्बोधन गर्नुका साथै कृषि उत्पादनमा वृद्धि ल्याई नेपाली किसानलाई लाभ पुग्ने आशा गरिएको छ।