काठमाडौं- सुनचाँदी बजारमा बिहीबार छापावाल सुनको मूल्य एकैदिन प्रतितोला २ हजार ५ सयले बढेर ९९ हजार रूपैयाँमा कारोबार भइरहेको छ।

सुन बुधबार प्रतितोला ९६ हजार ५ सय रूपैयाँमा कारोबार भएको थियो। नेपाल सुनचाँदी व्यवसायी महासंघले सार्वजनिक गरेको विवरणानुसार बिहीबार तेजाबी सुनको मूल्य प्रतितोला ९८ हजार ५ सय रूपैयाँ तोकिएको छ। जसको मूल्य बुधबार प्रतितोला ९६ हजार थियो।

त्यस्तै बिहीबार चाँदीको मूल्य अघिल्लो कारोबार मूल्यका तुलनामा प्रतितोला ३५ रूपैयाँले बढेर १ हजार ३ सय १५ रूपैयाँ पुगेको महासंघले जनाएको छ।

महासंघले अन्तर्राष्ट्रिय बजारमा सुन तथा चाँदीका मूल्यमा हुने उतारचडावका आधारमा यहाँ दैनिक कारोबार मूल्य तोक्दै आएको छ।

नेपालको सुनचाँदी बजारमा अन्तरराष्ट्रिय कारोबारले प्रभाव पार्ने हुँदा विश्व बजारमा सुनचाँदीका मूल्य बढे अनुसारनै आज नेपालको बजारमूल्यमा त्यसको प्रभाव परेको महासंघका अध्यक्ष मनिकरत्न शाक्यले जानकारी दिए। अन्तर्राष्ट्रिय बजारमा बिहीबार सुन प्रतिऔँस एक हजार ९ सय ३९ डलर आसपास कारोबार भइरहेको छ।