काठमाडौं- सगरमाथा क्षेत्रमा रहेको कोङ्दे पिक गेष्ट हाउस आगलागीले ध्वस्त भएको छ। पर्यटकीय क्षेत्रमा रहेको होटलमा के कारण आगलागी भएको हो भन्ने खुलेको छैन।
समुन्द्री सतहबाट २७०० मिटर माथि फाक्दिङ क्षेत्रमा रहेको उक्त गेष्ट हाउसमा गत फागुन २ गते बेलुकी साँझ ७ बजे आगलागी भएको सञ्चालक लाक्पा नुरू शेर्पाले जानकारी दिए। आगलागीको घटना तीन दिनपछि मात्र थाहा भएको उनले बताए। अहिले एभरेस्टको सिजन सुरू नभएकाले होटल बन्द रहेको थियो।
‘अहिले अफ सिजन भएकोले बन्द गरेर कामठमाडौं आएका थियौँ, सोही समयमा आगलागी भएछ,’ सञ्चालक शेर्पाले भने।
आगलागीपछि कुनै पनि सामान सग्लो नरहेकोले आठ करोड रूपैयाँभन्दा बढीको क्षति भएको शेर्पाले बताए। आगलागीपछि गेष्ट हाउस पूरै नयाँ स्वरुपमा बनाउनुपर्ने भएको समेत शेर्पाले जानकारी दिए।
