काठमाडौं- चिनियाँ वैज्ञानिकहरूले संसारकै अग्लो हिमाल सगरमाथा नजिकै लिथियम भण्डारण रहेको दाबी गरेका छन्।
सगरमाथाको तिब्बत क्षेत्रमा अहिलेको बहुमूल्य पदार्थ लिथियम भेटिएको चिनियाँ वैज्ञानिकको एक टोलीले दाबी गरेको साउथ चाइना मर्निङपोष्टले उल्लेख गरेको छ।
तिब्बततिरको सगरमाथा क्षेत्रमा लिथियम भेटिएको इन्स्टिच्युट अफ जियोलोजी एण्ड जियोफिजिक्सको समूहले दाबी गरेको छ। चिनियाँ एकेडेमी अफ साइन्स अन्तर्गतको यो समूहले उक्त क्षेत्रमा १० लाख टन भन्दा बढी लिथियम अक्साइड रहेको दाबी गरेको छ।
यद्यपि यो प्रारम्भिक अनुमान मात्र हो। यो क्षेत्रमा वास्तविकतामा कति लिथियम भण्डार छ भन्ने कुरा अझै यकिन भएको छैन। यो चीनकै तेस्रो ठूलो लिथियम भण्डार हुनसक्ने अनुमान गरिएको छ।
वैज्ञानिकहरूले अहिले पूर्व सम्भाव्यता अध्ययन भएकाले उत्खननको यात्रा लामो रहेको बताएका छन्। यद्यपि अहिलेको अध्ययनबाट यो क्षेत्रको लिथियम उच्च औद्योगिक मूल्यको रहेको उनीहरूको दाबी छ। पत्थरमा टाँसिएर रहेको सगरमाथा क्षेत्रको लिथियम अष्ट्रेलियामा पाइने जस्तै रहेको उनीहरूको दाबी छ।
विद्युतीय कारमा उपयोग हुने ब्याट्रीको महत्वपूर्ण मानिने लिथियमलाई अहिलेको सबैभन्दा रणनीतिक पदार्थ मानिएको छ। विद्युतीय कार उत्पादनको तीव्र प्रतिस्पर्धाका बीचमा चीन संसारकै ठूलो उत्पादक हो।
चीन लगायत संसारका ठूला औद्योगिक देशको आँखा यही लिथियममा छ। लिथियमको मूल्य पनि पछिल्लो समय बढ्दै गएको छ।
