म्याग्दी- म्याग्दीको अन्नपूर्ण गाउँपालिका-८ राम्चे काफल डाँडाका जगबहादुर फगामी वैदेशिक रोजगारबाट फर्किएर सुरु गरेको बाख्रा पालनबाट आत्मनिर्भर बनेका छन्।

रोजगारको शिलसिलामा तीन वर्ष मलेसियामा काम गरेका फगामीले कम्पनीले पारिश्रमिक नदिएर धोका दिएपछि गाउँ फर्किएर बाख्रा पालन सुरु गरेका थिए।

‘विदेशको ठक्करले गाउँ फर्किएर एउटा बाख्रा किनेर खेती किसानी गरेर परिवार चलाउन थालेको थिएँ, जुम्ल्याह पाठा पाठी जन्माउन थालेपछि बाख्राको संख्या बढ्दै गयो, राम्चे बाबा समूहको ५३ वटा बाख्रा दुई लाखमा किनेपछि व्यावसायिक बनाएको हुँ’ फगामीले भने।

उनी अहिले गाउँमै उपलब्ध स्रोत, श्रम र सीपको सदुपयोग गर्दै आत्मनिर्भर बन्न सकिन्छ भन्ने उत्कृष्ट उदाहरणको पात्र बनेका छन्। विगत ६ वर्षदेखि बाख्र पालनलाई व्यवस्थित र व्यावसायिक बनाएका छन्। फगामीले सञ्चालन गरेको ‘सुतारे एकीकृत कृषि तथा पशुपंक्षि फर्म’मा अहिले एकसय ५० वटा बाख्रा छन्।

फर्ममा रहेका ४० वटा माउ बाख्रा व्याउने छन्। चाडपर्व र विभिन्न पूजा आजामा खसीबोका र पाठा पाठीको बिक्रीहुने गरेको छ। उत्पादन भएका खसीबोका गोठ र खोरबाटै बिक्री हुने गरेको बाख्रा पालक कृषक फगामीले जानकारी दिए। उनकाअनुसार, बाख्रा पालनबाट मासिक ४० हजारदेखि ५० हजार रुपैयाँसम्म आम्दानी हुने गरेको छ।

फर्ममा फगामी दम्पतीका साथै छोरा बुहारीले बाख्राको रेखदेख र स्याहार गर्दै आएका छन्। चरन क्षेत्रमा लैजानका लागि एक जनालाई रोजगारिसमेत दिइएको छ। हिउँद याममा बेसीँका फाँटमा खेतबारीमा घाँस खुवाएर मल बनाउने बाख्रालाई जेठ लागेपछि भने ढरुवा, धौलापारा, साँधीखर्कलगायतका लेकाली क्षेत्रका वनजंगलमा चरनका लागि लैजाने गरिएको छ।

बाख्रा पालनबाट स्वरोजगार र आत्मनिर्भर बन्नुभएका फगामीले बाख्र पालनसँगै भेडापालन गर्ने योजनासमेत बनाएका छन्। बाख्र पालनलाई थप व्यवसायिक बनाउनका लागि अहिले खोरको क्षमता विस्तार गरिएको छ।

आर्थिक वर्ष २०८१/०८२ मा अन्नपूर्ण गाउँपालिकाले पशुपंक्षिको लागि गोठखोर निर्माण योजनाबाट उपलब्ध गराएको अनुदानबाट करिब तीन सय बाख्रा पालन गर्न सक्ने क्षमताको खोर निर्माण गरिएको छ।

गाउँपालिकाबाट प्राप्त भएको एक लाख ६६ हजार रुपैयाँ अनुदान रकममा आफूहरुले श्रमदान र नगद साझेदारी गरी करिब साढे तीन लाख रुपैयाँ लगानीमा व्यवस्थित खोर निर्माण गरिएको बाख्रा पालनक किसान फगामीका छोरा राजु फगामीले बताए।

छोटो समयमै हुर्कने र अन्य पशुपंक्षिको तुलनामा नगद आम्दानीसमेत बढी हुने भएकाले सिंगाे परिवारले नै बाख्रा पालनलाई अंगालेका छन्। विभिन्न समयमा बाख्रामा आउने रोगको पहिचान गरी उपचार गर्न नसक्दा धेरै क्षति व्यहोरेका फगामी परिवारले हार नखाएर बाख्रा पालनलाई निरन्तरता दिएकै कारण अहिले सफलता प्राप्त गरेका हुन्।

आलुसँगै अन्नबालीको खेती किसानीसमेत गर्दै आएपनि घरपरिवारको अन्य आम्दानीको स्रोत नहुँदासमेत बाख्र पालनबाटै भएको आम्दानीबाट परिवारले घरखर्च जुटाउँदै आएको फगामीले बताए। उत्पादन भएका खसीबोका र पाठा पाठीको उचित बजारको सुनिश्चित हुन सकेमा बाख्र पालनलाई अझै व्यावसायिक बनाउने फगामी परिवारको योजना छ। रासस