चितवन- यहाँको लोथर खोला र राप्ती दोभानको किनारमा पेट्रोलियम पदार्थ भण्डारण गृह निर्माण गरिने भएको छ। सो स्थानमा अमलेखगञ्ज-लोथर पेट्रोलियम पाइपलाइन विस्तार गरी भण्डारण गृह निर्माण गरिने भएको हो।

भण्डारण गृह बनाउन राप्ती नगरपालिका-१ मा २३ विगाहा १२ कठ्ठा जमिन नेपाल आयल निगमले खरिद गरेर साइट अफिस सञ्चालनमा ल्याइसकेको छ। चितवन र मकवानपुर जोड्ने लोथर पुलबाट सात सय मिटर पश्चिम लोथर खोलाको बाँधसम्म नियमले जग्गा लिएको हो।

नेपाल आयल निगम र इण्डियन आयल कर्पोरेशनको सहकार्यमा १५ अर्ब रुपैयाँ लगानीमा अमलेखगञ्ज लोथर पेट्रोलियम पाइप लाइन तथा भण्डारण गृह निर्माण गरिँदै छ। आयल निगमले १० अर्ब र इन्डियन आयल कर्पोरेशनले पाँच अर्ब रुपैयाँ लगानी गरेर परियोजना बनाउन लागेका हुन्।

जग्गा खरिदमा ६० करोड खर्च भइसकेको छभने १० करोड रुपैयाँमा थप जग्गा खरिद प्रक्रियामा रहेको आयोजनाले जनाएको छ। आधुनिक प्रविधिबाट ग्रिनफिल्ड टर्मिनल निर्माण गर्न लागिएको हो। ६२ किलोमिटर लामो पाइपलाइन निर्माण गरी जुनसुकै बेला तीन हजार दुईसय किलोलिटर इन्धन क्षमताको भण्डारण गृह निर्माण गर्न लागिएको हो।

वार्षिक दुई करोड टन इन्धन ढुवानी गर्न सक्ने क्षमताको पाइप लाइन बनाउन लागिएको हो। तीन वर्षभित्रमा काम सक्ने जनाइएको छ। सो भण्डारण गृह निर्माण गर्दा लोथर खोला र राप्ती नदीमा बलियो तटबन्धन निर्माण हुने स्थानीयवासीले आशा गरेका छन्।

यससँगै रोजगारी प्राप्त हुने र व्यवसाय सञ्चालन गर्न सकिने उनीहरुको विश्वास छ। स्थानीय यमनाथ भट्ट भण्डारण गृह बनेसँगै बाढीको जोखिम घट्ने, रोजगारी पाइने र व्यवसाय चल्नेमा विश्वस्त छन्। उनले भने, ‘यो आयोजनाले हामी स्थानीयलाई फाइदा नै पुग्छ भन्ने आशामा छौँ।’

स्थानीय दीपक खड्काले आयोजना बनेसँगै कृषि उत्पादनले स्थानीय रुपमा बजार पाउने बताए। उनी भन्छन्, ‘जे काम जानिएको छ, मिल्दो काम त्यहाँ पाउन सकिन्छ।’ वडा अध्यक्ष सिद्धिलाल स्याङतान पनि भण्डारण गृह बनेसँगै पूर्वी चितवन बाढीबाट सुरक्षित हुने बताउँछन्।

‘यो चितवनकै गौरवको परियोजना हो, यसले दक्षता र क्षमता अनुसार स्थानीयलाई रोजगारी दिन्छ’ वडा अध्यक्ष स्याङतानले भने। दैनिक पाँच सयभन्दा बढी ट्यांकर ओहोरदोहोर गर्ने भएकाले यहाँका सानातिना होटल, रेष्टुरेन्ट, लजलाई फाइदा पुग्ने उनको भनाइ छ। रासस