भक्तपुर- विश्व सम्पदा सूचीमा सूचीकृत चाँगुनारायण मन्दिरमा एक वर्षमा ३१ हजार दुईसय २५ विदेशी पर्यटक आएका छन्।

चाँगुनारायण पर्यटक सूचना केन्द्रकी प्रमुख सविता बस्नेतका अनुसार मन्दिरमा भारतलगायत सार्क राष्ट्रबाट पाँच हजार सात सय ५६ पर्यटकको आगमन भएको हो। त्यसबाहेक युरोपेली देशबाट २५ हजार चार सय ५९ पर्यटकको आएका छन्।

विदेशी पर्यटकबाट चाँगुनारायणले एक करोड १९ लाख १० हजार चार सय रुपैयाँ राजस्व संकलन गरेको छ।

भारतलगायत सार्क राष्ट्रबाट आएका पर्यटकबाट प्रतिव्यक्ति तीनसय रुपैयाँका दरले पर्यटन शुल्कबापत १७ लाख २६ हजार आठ सय रुपैयाँ राजस्व संकलन भएको हो। त्यस्तै अन्य राष्ट्रबाट आएका पर्यटकबाट प्रतिव्यक्ति चार सय रुपैयाँका दरले एक करोड एक लाख ८३ हजार ६ सय रुपैयाँ संकलन भएको उनकाे भनाइ छ।

चाँगुनारायण नगरपालिकाका प्रमुख जीवन खत्रीले पर्यटन शुल्कबापत संकलन भएकाे रकमलाई नगरपालिकाले चाँगुनारायण क्षेत्रसँगै नगरभित्रका विभिन्न ऐतिहासिक, धार्मिक, पुरातात्विक एवं पर्यटकीय क्षेत्रको विकासका लागि खर्च गर्दै आएको बताए। रसस