काठमाडौं- लामो समयदेखि अल्झिएको नेपाल र मिलेनियम च्यालेन्ज कर्पोरेसन (एमसिस)बीचको सम्झौता अनुमोदनको प्रक्रिया अघि बढेकोमा नेपाल उद्योग परिसंघले स्वागत गरेको छ।
अनुमोदनका लागि आज प्रतिनिधिसभामा टेबल भएको छ। २०७४ भाद्र २९ गते भएको नेपाल सरकार र एमसिसीबीचको सम्झौता संसदबाट अनुमोदन भइ कार्यान्वयनमा जाने र देशले आर्थिक लाभ हासिल गर्ने परिसंघको विश्वास छ।
सम्झौता संसदबाट अनुमोदनका लागि आवश्यक पहल गरेकोमा परिसंघले सरकार तथा राजनीतिक दललाई धन्यवाद दिएको छ।
'नेपालको आर्थिक विकासमा रणनीतिक महत्व दिने विद्युत र सडक क्षेत्रको विकासका लागि यो सम्झौता महत्वपूर्ण छ । लामो छलफल र तयारीपछि नेपालले प्रस्ताव गरेका आयोजनाको कार्यान्वयन दीगो आर्थिक विकासका आधार हुन सक्छन् । दीगो विकासका लक्ष्य हासिल गर्न र कोभिडपश्चातको आर्थिक पुनरूत्थानका लागि ठूलो लगानी चाहिन्छ । यसका लागि पनि एमसिसी जस्ता पूर्वाधार सहयोग परियोजना नेपालका लागि आवश्यक छ' परिसंघले जारी गरेको प्रेस विज्ञप्तिमा उल्लेख गरिएको छ।
