काठमाडौं- सन् २०२१ मा विश्व व्यापार महामारी अघिको अवस्थामा पुगेको छ। यूएन कन्फ्रेन्स अन ट्रेड एण्ड डेभलेपमेन्टले सार्वजनिक गरेको प्रतिवेदन अनुसार व्यापार मूल्य सन् २०१९ कै तुलनामा वृद्धि भएको छ।
वस्तु तथा सेवाको व्यापार यो अवधिमा बढेको छ।
तथ्यांक अनुसार विश्व व्यापारको मूल्य हालसम्मकै उच्च पुगेको छ। सन् २०२१ मा २८.५ ट्रिलियन अमेरिकी डलर बराबरको व्यापार भएको छ। यो सन् २०२० को तुलनामा २५ प्रतिशत र २०१९ को तुलनामा १३ प्रतिशतले बढी हो।
सन् २०२१ मै सेवा व्यापार ५० अर्ब डलरले बढेको छ। विकासोन्मुख मुलुकहरूको व्यापार झनै बढेको छ। तथ्यांक अनुसार विकासोन्मुख अर्थतन्त्रमा आयात तथा निर्यात बढेको छ। विकासोन्मुख क्षेत्रमा व्यापार ३० प्रतिशतले बढेको छ। सन् २०१९ को तुलनामा १५ प्रतिशतले बढेको छ।
सन् २०२१ मा बलियो वृद्धि देखिएपनि सन् २०२२ मा भने अपेक्षित वृद्धि नहुने संस्थाले प्रक्षेपण गरेको छ।
