काठमाडौं- २०८१ असार ३१ गते २२४०.४१ बिन्दुमा रहेको सेयर बजार आज २०८२ असार ३२ गते २७९४.७९ बिन्दुमा पुगेको छ। एक वर्षमा बजार ५५४.३८ अंकले बढेको छ।     

गएको वर्ष असार अन्तिममा २२४० मा रहेको बजारमा साउनभर उछाल देखिँदै ३०००.८१ को बिन्दुसम्म पुगेको थियो। गएको वर्ष साउनमा ९ दिनसम्म २० अर्ब रुपैयाँमाथिको कारोबारसमेत भएको थियो। साउन ३१ गते त अहिलेसम्मकै सर्वाधिक कारोबार रकम २९ अर्ब ९५ करोड ८३ लाख रुपैयाँ पुगेको थियो। यो वर्ष पनि साउनमा बजारले उचाइको संकेत गरेको छ। 

गएको साता समग्रमा २७.८४ अंकले बढेको सेयर बजार त्यसअघिको साता १०८.१९ अंकले बढेको थियो। सकारात्मक गतितर्फ लाग्ने संकेत गरिरहेको बजारमा मौद्रिक नीतिले लगानीकर्ता थप उत्साहित देखिएका छन्। 

यो साता पहिलो कारोबारमा आइतबार २९ अंकले बढेर २७६०.८१ बिन्दुमा पुगेको बजार सोमबार ३५.०९ अंकले घटेर २७२५.७१ बिन्दुमा झरेको थियो। मंगलबार ३४.४६ अंकले बढेको बजार बुधबार पनि ३४ अंकले बढेको हो। 

आज बुधबार ३४.६१ अंकले बढेर २७९४.७९ बिन्दुमा पुगेको छ। १४ अर्ब ३ करोड ४८ लाख रुपैयाँको कारोबार भएको बजारमा १९३ कम्पनीको सेयर मूल्य बढेको छ। ५५ कम्पनीको सेयर मूल्य घटेको छ। 

बुधबार सबै समूहमा हरियाली देखिएको छ। जहाँ बैंकिङ समूह १.५९, विकास बैंक ३.८६, हाइड्रोपावर १.२८, फाइनान्स ०.७५, माइक्रोफाइनान्स १.८५, लाइफ इन्स्योरेन्स ०.६६ र ननलाइफ इन्स्योरेन्स १.८५ प्रतिशतले बढेको छ। 

२०७८ भदौ २ गते कीर्तिमान बनेको हालसम्मकै उच्च ३१९९ को बिन्दु पार हुने पर्खाइमा लगानीकर्ता लामो समयदेखि देखिन्छन्। अहिले पुन: बजारमा नयाँ उचाइतर्फको आधार खडा भएको छ। संगठित लगानीकर्तासमेत सकारात्मक बनिरहेका छन्। 

मौद्रिक नीतिले बैंकहरूको बिजनेस विस्तारमा थप सहयोग पुग्ने देखिएसँगै सेयर बजारमा समेत बैंकहरूको मूल्यमा उछाल आइरहेको विश्लेषकहरू बताउँछन्। अहिले बैंकिङ समूहमा देखिएको वृद्धिले बजारलाई बलियो रुपमा उचाइतर्फ जान सहयोग पुग्ने उनीहरूको भनाइ छ। 

अहिलेको वृद्धिमा लगानीकर्ताको मनोवैज्ञानिक अवस्थादेखि नीतिगत साथसम्म मिलेकाले अब नयाँ उचाइतर्फ लाग्ने विश्लेषकहरू बताउँछन्।