म्याग्दी- गण्डकी प्रदेश सरकारमार्फत म्याग्दीमा आर्थिक वर्ष २०८१/८२ मा चारवटा सडक स्तरोन्नतिसम्बन्धी योजना थपिएका छन्।

संघीय सरकारसँगको साझेदारीमा एक र प्रदेश सरकारको लगानीमा कार्यान्वयन हुने तीनवटा सडक स्तरोन्नतिसम्बन्धी आयोजना कार्यान्वनयका लागि विभिन्न निर्माण कम्पनीसँग ६० करोड रुपैयाँमा ठेक्का सम्झौता भएको छ।

चारवटा सडक स्तरोन्नति र एक झोलुङ्‍गे पुल निर्माणसम्बन्धी योजनाको ठेक्का प्रक्रिया सकेर निर्माणको चरणमा प्रवेश गरेका पूर्वाधार विकास कार्यालयका प्रमुख विष्णुप्रसाद पौडेलले जानकारी दिए। उनका अनुसार ती आयोजना बर्खायामलगत्तै निर्माण सुरु गर्ने तयारी छ।

दरवाङ-मुना-ढोरपाटन सडक

गण्डकी प्रदेश र संघीय सरकारको साझेदारीमा मालिका गाउँपालिकाको केन्द्र दरवाङबाट धवलागिरि गाउँपालिकाको केन्द्र मुना जोड्ने दरवाङ-मुना- ढोरपाटन सडक स्तरोन्नतिका लागि २०८२ असार ११ गते सक्षम/सिम्रन जेभी र पूर्वाधार विकास कार्यालयबीच ५२ करोड ८० लाख ५३ हजार रुपैयाँमा ठेक्का सम्झौता भएको छ।

२७ महिनाको ठेक्का अवधि रहेको यो योजनामार्फत दरवाङ-धारापानी (सात किलोमिटर) र झिनडाँडा-मुना (चार किलोमिटर) अक्सफाल्ट प्रविधिको कालोपत्र र ढलान हुनेछ।

मङ्गला, मालिका र धवलागिरि गाउँपालिकाका साथै बागलुङको ढोरपाटन र पूर्वीरुकुमका बासिन्दालाई पोखरा-काठमाडौं जावतजावत गर्न ७० किलोमिटर छोटो पर्ने मध्यपहाडी लोकमार्गको बागलुङ खण्डको वैकल्पिक मानिएको यो सडक म्याग्दीको प्राथमिकताप्राप्त योजना भएको म्याग्दी क्षेत्र नं १ (२) बाट निर्वाचित प्रदेशसभा सदस्य रेशमबहादुर जुग्जालीले बताए।

भगवती-बेग सडक

रघुगङ्गा गाउँपालिका गलेश्वर-पिप्ले-भगवती हुँदै बेग जाने बाटो र भगवती-सिजलगाउँ-साझपानी-बयारीगाउँ-बेग सडक स्तरोन्नतिका लागि हिमालयन कन्ट्रक्सनसँग २०८२ असार ९ गते ठेक्का सम्झौता भएको छ।

दुई करोड ८२ लाखमा ठेक्का सम्झौता भएको यस योजनामार्फत भगवतीस्थित यसअघि प्रदेश सरकारमार्फत स्तरोन्नति भएको सडकको अन्तिम बिन्दुबाट बेगतर्फ एक किलोमिटर चार सय मिटर ढलान र प्रिमिक्स कालोपत्र हुने म्याग्दी क्षेत्र नं १ (१) बाट निर्वाचित प्रदेशसभा सदस्य हरिबहादुर भण्डारीले बताए। 

रुम-ताराखोला सडक

म्याग्दी निर्वाचन क्षेत्र १ (२) अन्तर्गत मालिका गाउँपालिका-२ को रुम-ताराखोला सडक योजना कार्यान्वयनका लागि २०८२ असार ४ गते सोमरस निर्माण सेवासँग ठेक्का सम्झौता भएको छ।

दुई करोड ११ लाख ३० हजारमा ठेक्का सम्झौता भएको यो योजनामार्फत सात सय मिटर सडक ढलान गरिने भएको छ।

गलेश्वर-पुुलाश्रम सडक  

घतान-९ गलेश्वर मन्दिरबाट पुलाश्रम मन्दिर जगन्नाथ मन्दिर भएर बेनी बजार सदरमुकाम मोटरबाटो सडक स्तरोन्नतिका लागि बिबिपीएल बिएस डिएस धवलागिरि छनोट भएको छ।

दुई करोड २३ लाख ४६ हजारमा बेनी नगरपालिका-९ गलेश्वरबाट अर्को धार्मिकस्थल पुलाश्रम जोड्ने सडकअन्तर्गत बेनी नगरपालिका-९ का विभिन्न ठाउँमा दुई किलोमिटर ढलान र ग्राभेल गर्न लागिएको हो।

सावाटा-थापाचौर झोलुङ्‍गे पुल

मालिका गाउँपालिका-५ थापाचौर र वडा नं ६ को सावटा बस्ती जोड्ने म्याग्दी नदीमाथि झोलुङ्‍गे पुल निर्माणका लागि ठेक्का सम्झौता भएको छ।

९६ मिटर लामो झोलुङ्‍गे पुल निर्माणका लागि पूर्वाधार विकास कार्यालय र ठेकेदार कम्पनी सोमरस निर्माण सेवासँग ३९ लाखमा २०८२ असार ३ गते ठेक्का सम्झौता भएको हो। 

प्रदेश सरकारमार्फत आव २०८०/८१ मा म्याग्दीमा सातवटा सडक र दुईवटा मोटरेबल पुल निर्माणका लागि ६७ करोड ७८ लाखमा ठेक्का सम्झौता गरेको थियो। त्यसअघिका वर्षका एक सडक र एक मोटरेबल पुल निर्माणाधीन छन्। रासस