काठमाडौं- नेपाल राष्ट्र बैंकले मार्जिन कर्जामा अझै कडाइ गर्ने संकेत गरेको छ। 

चालु वर्षका लागि ल्याइएको मौद्रिक नीतिको अर्ध वार्षिक समीक्षा गर्दै ट्रष्ट रिसिट लगायतका आयात कर्जा, व्यक्तिगत अधिविकर्ष कर्जा, जग्गा प्लटिङसम्बन्धी रियल इस्टेट कर्जा, व्यक्तिगत हायर पर्चेज कर्जा तथा मार्जिन प्रकृतिको कर्जाकोजोखिम भारमा पुनरावलोकन गर्ने राष्ट्र बैंकले घोषणा गरेको छ। 

जोखिमभार पुनरावलोकन गर्ने भनेको यस्ता क्षेत्रमा जाने र गएको कर्जालाई कडाइ गर्न खोजिएको छ। यद्यपि सबै कर्जामा कडाइ हुने वा खुकुलो हुने भन्ने अहिले नै भन्न नसकिने नेपाल राष्ट्र बैंकका प्रवक्ता गुणनाकर भट्टले जानकारी दिए। 

'यसको निर्क्यौल विस्तृत निर्देशन(सर्कुलर)मा हुन्छ। तर जोखिमको भारमा हेरफेर हुँदा कुनैमा अहिले धेरै टाइट रहेछ भने खुकुलो पनि हुनसक्छ' उनले भने। 

उनले यसो भनेपनि पछिल्लो समय बढ्दै गएको तरलता अभाव र बाह्य असन्तुलनलाई मध्यनजर गर्दै केन्द्रीय बैंकले मार्जिन प्रकृतिका कर्जालाई नियन्त्रण गर्न खोजिरहेको छ। 

विशेषगरी घरजग्गामा जाने ऋण, सेयर धितोमा जाने ऋणमा कडाइ गर्न खोजिएको छ। त्यस्तं व्यक्तिगत हायरपर्चेज कर्जामा पनि कडाइ गरिने छ।