लमजुङ- फुटबल खेलाडी सावित्रा भण्डारी ‘साम्बा’को सम्मानमा नामकरण गरिएको साम्बा चोक यतिबेला पर्यटकको नयाँ गन्तव्य बन्न थालेको छ। मर्स्याङदी गाउँपालिका-९ खुदीपुल वारिको क्षेत्रलाई ‘साम्बा’ चोक नामकरण गरेसँगै यतिबेला पर्यटकको नयाँ र मुख्य गन्तव्य बन्न थालेको हो।

मर्स्याङदी गाउँपालिकाले सावित्राको फोटोको होर्डिङबोर्ड बनाएर स्तम्भ स्थापना गर्दै सो क्षेत्रलाई  साम्बा चोक नामकरण गरेकाे छ। उक्त चाेक यतिबेला पर्यटकको नयाँ गन्तव्य बन्न थालेको हो।

गाउँपालिका अध्यक्ष अर्जुन गुरुङका अनुसार फुटबल क्षेत्रमा स्थापित उनलाई सम्मान गर्न साम्बा चोक नामकरण गरिएकाे हाे। पालिकावासी, जिल्लावासी, पर्यटक तथा खेलकुद प्रेमीका लागि साे स्थानमा घुम्न उपयुक्त छ।

यतिबेला यहाँ जिल्लाको विभिन्न स्थानदेखि छिमेकी जिल्ला मनाङ, गोरखा, तनहुँ, कास्की, काठमाडौंबाट समेत पर्यटक आउन थालेका छन्। स्थानीय प्रदिप गुरुङका अनुसार पर्यटक यहाँ साम्बाको चोक तथा साम्बाको तस्बिरसँग सेल्फी तथा फोटो खिच्ने, भिडियो बनाउने, टिकटक बनाउँदै रमाउने गरेका छन्।

डुम्रे-बेँसिहर-चामे सडकखण्डमा पस्ने साम्बा चोकमा बेँसीसहरबाट खुदी भुलुभुले, घनपोखरा, सिउरुङ, हिमाली जिल्ला मनाङ जाने र ती स्थानबाट बेँसीसहरतर्फ आउने यात्रीसमेत एकैछिन सवारीसाधन रोकेर यात्रीहरूले साम्बा चोकको अवलोकन गर्छन्।

यहाँ दैनिक पाँच सय जनाभन्दा बढी पर्यटक आउने र बिदाकाे समयमा दोब्बर आउने गरेको बताइएको छ। यहाँ आएका पर्यटक शंकर घिमिरे भन्छन्, ‘महिला फुटबल खेलाडीको स्तम्भ तथा होर्डिङ बोर्ड राखेर नामकरण गरेर साम्बा चोक राखेको थाहा पाएपछि अवलोकन तथा घुम्न आएको हुँ।’

यहाँ आइपुग्दा निकै खुसी लागेको र मनै आनन्द प्राप्त भएको उनको भनाए छ। अर्का पर्यटक मर्स्याङदी गाउँपालिका वडा नं. ३ ढगैँका पुर्ण गुरुङले पालिकाकै चेली सावित्राको नाममा बाट नामरण भएको साम्बा चोकमा आउँदा गर्व लागेको र यस चोकको अझै प्रचारप्रसार गर्न सके पर्यटक वृद्धि हुने बताए।

साम्बा चोक अवलोकन गर्न तथा विभिन्न तरिकाले रमाउन पर्यटक आगमन हुँदा आसपासका होटल व्यवसायसमेत फस्टाउन थालेको व्यवसायीहरूको भनाइ छ।

अन्नपूर्ण पदमार्ग, मनाङ जाने सडकमा अवस्थित मर्स्याङदीको चर्चित खुदीबजार पुलको चोकलाई साम्बा चोक नामकरण गरेर उनको जन्मस्थानको पहिचान र प्रचारमा थप टेवा पुगेसँगै यहाँ पर्यटक आगमन वृद्धि हुँदै गएको वडाध्यक्ष हरिशचन्द्र थापाले बताए।

गाउँपालिकाका सूचना अधिकारी सुरेश गौतमका अनुसार साम्बाको होर्डिङ बोर्ड र स्तम्भ निर्माण गर्न करिब पौने दुई लाख खर्च भएको छ। गत जेठ ५ गते यहाँ साम्बा चोक नामकरण भएयता पर्यटक दैनिक वृद्धि हुँदै गएको र यसको अझै प्रचारप्रसार गर्दै पर्यटक वृद्धि गर्न लाग्नुपर्ने स्थानीयको भनाइ छ।

साम्बा चोक लमजुङ सदरमुकाम बेँसीसहरबाट करिब आठ किलोमिटर दूरी सवारी साधनमा २०-३० मिनेटमा पुग्न सकिन्छ। खेल जगतमार्फत नेपाललाई विश्वसामु थप चिनाउन अहम् भूमिका खेल्दै आएकी भण्डारी लमजुङ तत्कालीन सिम्पानी गाविस-७ हाल मर्स्याङदी गाउँपालिका-९ पामचोक गाउँमा हुर्किएकी हुन्।

उनी थमन भण्डारी र मुना भण्डारीको कोखबाट २०५३ साल जेठ १५ गते माइली छोरीका रुपमा जन्मिएकी हुन्। सावित्रा भण्डारी नेपाली फुटबल क्षेत्रमा साम्बा उपनामले परिचित छन्। सशस्त्र प्रहरी बल क्लबबाट व्यावसायिक फुटबल खेल्न सुरु गरेकी साम्बाले अहिले नेपाली महिला फुटबल टोलीको सर्वाधिक उच्च गोलकर्ता बनेकी छन्।

साबित्रा अन्तर्राष्ट्रिय प्रतियोगितामा सर्वाधिक गोल गर्ने नेपाली खेलाडी पनि हुन्। नेपाली महिला फुटबलको क्षेत्रमा उदयमान नक्षत्रका रूपमा परिचित हुनुअघि भण्डारीलाई लमजुङकै आफ्नै गाउँ नजिकै रहेको खुदीस्थित मनास्लु युवा क्लबमा सहभागी भएर फुटबल खेल्ने अवसर मिल्यो।

उक्त क्लबमा आबद्ध भएर क्व्होलासोथर गाउँपालिका-३ स्थित दक्षिण एसियाकै नमूना घलेगाउँमा आयोजना गरिएको फुटबल प्रतियोगितामा सहभागी भइन्। त्याे बेला महिला फुटबल प्रतियोगितामा भण्डारी सहभागी भएको टिम मनास्लु युवा क्लब प्रथम भएको थियो।

गोल गर्ने उत्कृष्ट कला, सेलिब्रेसन गर्ने शैली अनि हेअर स्टाइलले गर्दा पनि साम्बा नामले परिचित भण्डारी अरू फुटबलरभन्दा फरक रुपमा स्थापित हुँदै आएकी छन्।

जिल्लाको गाउँको खेतका गहराबाट दशरथ रंगशाला हुँदै युरोपको रंगशालासम्म पुगेकी भण्डारी यतिबेला युरोपेली देश फ्रान्सेली महिला फुटबलको माथिल्लो डिभिजनमा खेल्ने अन आभान्टा ग्वेनगाम्पले डेढ वर्षका लागि अनुबन्ध गरेपछि त्यहाँ फुटबल खेल्न थालेकी छन्।

सोअघि इजरायलको हापोएल रानानाबाट खेलेसँगै युरोपमा व्यावसायिक फुटबल खेल्ने पहिलो नेपाली खेलाडी पनि भण्डारी नै हुन्। रासस