सोमबार, साउन ३० गते २०७९

किसानलाई व्यावसायिक बनाउँदै गाउँपालिका

images
विजनेस न्युज
किसानलाई व्यावसायिक बनाउँदै  गाउँपालिका

गाउँपालिकाले युवा किसानमा बढ्दो बिचलनलाई नियन्त्रण गर्न र कृषि कार्यमा प्रेरित गर्न निःशुल्क तथा अनुदानमा विभिन्न अन्नबाली र  तरकारीको बीउ वितरण गर्दै आएको छ ।

बाँके- बाँकेको जानकी गाउँपालिकाले कृषिमा संलग्न किसानलाई व्यावसायिक खेती गर्न आकर्षण गर्दै आएको छ । गाउँपालिकामा जनप्रतिनिधि निर्वाचित भएर आएपछि किसानलाई आवश्यक मल, बीउ र सिँचाइको व्यवस्था गर्दै आएको हो । गाउँपालिकालाई कृषिबाटै आर्थिक समृद्धि बनाउनका लागि ‘गाउँपालिका अध्यक्ष कृषि कार्यक्रम’अन्तर्गत किसान लक्षित धेरै कार्यक्रम सञ्चालन गरिएको कार्यवाहक अध्यक्ष भूमिसरा धितालले बताइन्।  

images
images
images

उनका अनुसार निर्वाहमुखी खेती गर्दै आएका किसानलाई व्यावसायिक बनाउँदै बेमौसमी तरकारी तथा फलफूल खेती गर्र्न गाउँपालिकाले प्रोत्साहन गर्नाका साथै बसन्ते मकैको र धानको पकेट क्षेत्रका रुपमा विकास गरिँदै  लगिएको छ । यहाँको हावा, पानी र उर्वर माटोका कारण गाउँपालिकालाई नै बसन्ते मकै, धान र तरकारी पकेट क्षेत्रका रुपमा विकास गर्न सकिने गाउँपालिका कृषि शाखा प्राविधिक सहायक धनञ्जय शर्माले बताए। उनका अनुसार पालिकामा अझै बस्तीको विकास भइनसकेको र यहाँको माटोमा उर्वर शक्ति बढी रहेकाले कृषि कार्यलाई प्राथमिकताका साथ सञ्चालन गरी आर्थिक समृद्धि गर्न सकिने छ । हाल गाउँपालिकाको वडा नं ४ र ५ लाई बसन्ते मकै र धानको पकेट क्षेत्रका रुपमा लिइएको छ । यी वडामा विषेशगरी यही अन्नबाली लगाउँदै आइएको छ । राम्रो र बढी उत्पादन हुने भएकाले यही बालीलाई किसानले प्राथमिकता दिएका हुन् । 

गाउँपालिकाका अन्य ठाउँमा तरकारीको राम्रो सम्भावना रहेको कृषि शाखाको सर्भेक्षण देखाएको छ । शाखाका अनुसार वडा नं १, २ र ३ लाई तरकारीको पकेट क्षेत्र बनाउन सकिने सम्भावना छ ।गाउँपालिकामा युवालाई कृषि क्षेत्रमा आकर्षित गर्नका लागि थुप्रै कार्यक्रम सञ्चालनमा जोड दिएको गाउँपालिका आर्थिक विकास शाखा संयोजक धर्मा थापाले बताए। 

'कृषि क्षेत्रलाई राम्रो बनाउन सकेमा मानिसले स्वस्थ खानेकुरा खान पाउन,  स्वस्थ रहन सहयोग पुग्नाका साथै आवश्यक तरकारी खपत सजिलै गर्न सकिन्छ' उनले भने,'युवालाई स्वदेशमै कृषि काममा लगाएर व्यावसायिक खेती गरी आर्थिक समृद्धि गर्नेतर्फ हामीले जोड दिएका छौँ।'

गाउँपालिकाले युवा किसानमा बढ्दो बिचलनलाई नियन्त्रण गर्न र कृषि कार्यमा प्रेरित गर्न निःशुल्क तथा अनुदानमा विभिन्न अन्नबाली र  तरकारीको बीउ वितरण गर्दै आएको छ । किसानलाई ५० प्रतिशत अनुदानमा तरकारीको हाइब्रिट बीउ वितरण गरिरहेको प्राविधिक शर्माले बताए। रासस

 

images

प्रकाशित : बिहीबार , फागुन ५ २०७८०२:५२
प्रतिक्रिया दिनुहोस
images
ट्रेन्डिङ